തിരുവനന്തപുരം: സംസ്ഥാനത്ത് പുതിയ ബാറുകള് അനുവദിക്കില്ലെന്ന് എക്സൈസ് മന്ത്രി ടി.പി രാമകൃഷ്ണന്. നേരത്തേ യുഡിഎഫ് സര്ക്കാര് അനുമതി നല്കിയ ബാറുകള് മാത്രമേ പ്രവര്ത്തിക്കുകയുള്ളൂവെന്നും മന്ത്രി വ്യക്തമാക്കി. പഞ്ചായത്തുകളില് ബാര് തുറക്കാന് സുപ്രീംകോടതി അനുവദിച്ചിട്ടുണ്ടെന്നും അദ്ദേഹം കൂട്ടിച്ചേര്ത്തു. പതിനായിരത്തിനു മുകളില് ജനസംഖ്യയുള്ള പഞ്ചായത്തുകളെ നഗര മേഖലയായി കണക്കാക്കാന് സംസ്ഥാന സര്ക്കാര് തീരുമാനിച്ചിരുന്നു. വിനോദ സഞ്ചാര മേഖലയില് സ്ഥിതി ചെയ്യുന്ന പഞ്ചായത്തുകളില് പതിനായിരമെന്ന ജനസംഖ്യയ്ക്ക് ഇളവ് അനുവദിച്ചതോടെ ഇവിടങ്ങളിലും കൂടുതല് ബാറുകള് തുറക്കാനാകും.
ദേശീയ സംസ്ഥാന പാതയോരങ്ങളില് 500 മീറ്റര് ദൂരപരിധിയില് മദ്യശാല പാടില്ലെന്ന വിധിയില് സുപ്രീംകോടതി ഭേദഗതി വരുത്തിയതോടെയാണ് സംസ്ഥാന സര്ക്കാര് പുതിയ ഉത്തരവ് പുറത്തിറക്കിയത്. ദേശീയ, സംസ്ഥാന പാതയോരത്തുള്ള നഗര സ്വഭാവമുള്ള പഞ്ചായത്തുകളില് ബാറുകള് തുറക്കുന്ന കാര്യത്തില് സംസ്ഥാന സര്ക്കാരിനു തീരുമാനമെടുക്കാമെന്നാണ് ചീഫ് ജസ്റ്റിസ് ദീപക് മിശ്ര അധ്യക്ഷനായ മൂന്നംഗ ബഞ്ച് വിധിച്ചത്.