എ ആര് മുരുഗദോസും രജനികാന്തും ആദ്യമായി ഒന്നിക്കുന്ന സിനിമയാണ് ദര്ബാര്. ചിത്രത്തില് രജനികാന്ത് പൊലീസ് വേഷത്തിലാണ് എത്തുന്നത്. ആക്ഷൻ ത്രില്ലര് തന്നെയായിരിക്കും ചിത്രം. ഇപ്പോഴിതാ രജനികാന്ത് പൊലീസ് വേഷത്തിലുള്ള പുതിയ ലുക്ക് പുറത്തുവിട്ടിരിക്കുകയാണ് എ ആര് മുരുഗദോസ്.
നിരവധി ആക്ഷൻ രംഗങ്ങളുള്ള ഒരു ത്രില്ലര് ചിത്രമായിരിക്കും ദര്ബാര്. മുംബയിലെ ഒരു കോളേജിലാണ് പൊലീസ് ഇൻവെസ്റ്റിഗേഷൻ റൂം തയ്യാറാക്കിയിരിക്കുന്നത്. മുംബൈ ഛത്രപതി ശിവജി മഹാരാജ ടെര്മിനസ്, റോയല് പാംസ്, ഫിലിം സിറ്റി തുടങ്ങിയവിടങ്ങളിലായിരിക്കും ചിത്രീകരണം. അതേസമയം വെറും കുറ്റാന്വേഷണ കഥ മാത്രമായിട്ടില്ല ദര്ബാര് ഒരുക്കുന്നത്. അടുത്തിടെ ഹിറ്റായ സിരുത്തൈ ശിവ- അജിത് കൂട്ടുകെട്ടിലെ വിശ്വാസത്തിലേതു പോലെ കുടുംബ ബന്ധത്തിനും പ്രധാന്യമുള്ള സിനിമയായിരിക്കും ദര്ബാര്. നിവേത രജനികാന്തിന്റെ മകളായിട്ടാണ് ചിത്രത്തില് അഭിനയിക്കുക. നയൻതാരയാണ് നായിക.