സംവിധായകനും മുന്ഭര്ത്താവുമായ എ.എല്. വിജയ്ക്ക് വിവാഹമംഗളങ്ങള് ആശംസിച്ച് നടി അമല പോള്. വിജയ് നല്ലൊരു വ്യക്തിത്വത്തിനുടമയാണെന്നും അദ്ദേഹത്തിനു വിവാഹമംഗളങ്ങള് ആശംസിക്കുന്നുവെന്നും അമല പോള് പറഞ്ഞു. പുതിയ ചിത്രം ‘ആടൈ’യുടെ പ്രചാരണത്തിനിടെയാണ് അമലയുടെ പ്രതികരണം.
‘വിജയ് നല്ലൊരു വ്യക്തിത്വത്തിനുടമയാണ്. എ ഫന്റാസ്റ്റിക് ഹ്യൂമന്. പൂര്ണമനസ്സോടെ അദ്ദേഹത്തിന് വിവാഹ മംഗളാശംസകള് നേരുന്നു. ദമ്പതികള്ക്ക് ഒരുപാട് കുഞ്ഞുങ്ങള് ഉണ്ടാകട്ടെ.’ അമല പറഞ്ഞു. ഈ മാസം ജൂലൈ 11നായിരുന്നു വിജയ്യുടെ വിവാഹം. ചെന്നൈ സ്വദേശിയും ഡോക്ടറുമായ ഐശ്വര്യയാണ് വധു.
വിജയ്യുമായുള്ള വിവാഹമോചനത്തിനു ശേഷം തനിക്ക് സിനിമയില് വേഷങ്ങള് കുറയുമെന്നു ഭയപ്പെട്ടിരുന്നതായും അമല പറഞ്ഞു. ‘വിവാഹ മോചനത്തിനു ശേഷം സഹോദരിയുടെ വേഷം, അല്ലെങ്കില് നായികയുടെ സുഹൃത്ത് ഇങ്ങനെയുള്ള കഥാപാത്രങ്ങളേ ലഭിക്കൂ എന്ന ആശങ്ക ഉണ്ടായിരുന്നു. അതിജീവനത്തിനായി ടിവി സീരിയലുകളില് അഭിനയിക്കേണ്ടി വരുമോ എന്നുപോലും ഞാന് ഭയപ്പെട്ടു. ഇപ്പോള് ഒരുകാര്യം മനസ്സിലായി. കഴിവുണ്ടെങ്കില് നമ്മളെ തോല്പിക്കാന് ആര്ക്കും സാധിക്കില്ല.’ അമല വ്യക്തമാക്കി.
മൂന്ന് വര്ഷം നീണ്ട പ്രണയത്തിനൊടുവില് 2014 ജൂണ് 12 നായിരുന്നു അമലയുടെയും വിജയ്യുടെയും വിവാഹം. 2017 ഫെബ്രുവരിയില് നിയമപരമായി വേര്പിരിഞ്ഞു.