ഓണക്കാലത്ത് സംസ്ഥാനത്ത് വിഷ മദ്യ ദുരന്തമുണ്ടാകുമെന്ന മുന്നറിയിപ്പുമായി എക്സൈസ് ഇന്റലിജന്‍സ്. മലപ്പുറത്തും കോഴിക്കോടും വിഷ മദ്യ ദുരന്തമുണ്ടാകുമെന്നാണ് എക്‌സൈസിന്റെ മുന്നറിയിപ്പില്‍ പറയുന്നത്. അതുകൊണ്ട് ബിനാമി പേരുകളില്‍ കളളുഷാപ്പുകള്‍ നടത്തുന്നത് അപകടകരമാണെന്നും റിപ്പോര്‍ട്ടില്‍ പറയുന്നു. ഓണത്തോടനുബന്ധിച്ച് അതീവ ജാഗ്രത വേണമെന്ന് എല്ലാ ഇന്‍സ്പെക്ടര്‍മാര്‍ക്കും ഇന്റലിജന്‍സ് അസിസ്റ്റന്റ് കമ്മീഷണര്‍ക്കും എക്സൈസ് റിപ്പോര്‍ട്ട് നല്‍കി.
പുതിയ മദ്യനയത്തെ തുടര്‍ന്ന് മലപ്പുറത്ത് 197 കള്ളുഷാപ്പുകളും തുറന്നിരുന്നു. ഇതില്‍ ഭൂരിഭാഗവും ബിനാമി പേരിലാണ്. യഥാര്‍ത്ഥ നടത്തിപ്പുകാര്‍ പിന്നില്‍ നിന്ന് ഷാപ്പിലെ ജീവനക്കാരുടേയോ ഡ്രൈവര്‍മാരുടേയോ പേരിലാക്കിയാണ് കള്ളുഷാപ്പുകള്‍ നടത്തുന്നത്. വിഷമദ്യ ദുരന്തം ഉണ്ടായാലും കേസില്‍ നിന്ന് നടത്തിപ്പുകാര്‍ക്ക് എളുപ്പത്തില്‍ രക്ഷപ്പെടുന്നതിനു വേണ്ടിയാണ് ഇത്തരത്തില്‍ ചെയ്യുന്നത്. ഈ സാഹചര്യ മുന്നില്‍ കണ്ടാണ് എക്‌സൈസിന്റെ ജാഗ്രതാ നിര്‍ദേശം.
