പീഡനക്കേസില് കോടതി കുറ്റക്കാരനെന്ന് കണ്ടെത്തിയ ആള്ദൈവം ഗുര്മീത് റാം റഹീം സിങ്ങിനുള്ള ശിക്ഷ സിബിഐ കോടതി ഇന്ന് പ്രഖ്യാപിക്കും. ഗുര്മീതിനെ പാര്പ്പിച്ചിരിക്കുന്ന ഹരിയാനയിലെ റോത്തക് സുനരിയ ജയിലില് പ്രത്യേക സിബിഐ ജഡ്ജി ജഗ്ദീപ് സിങ് ഇന്ന് ഉച്ചയ്ക്കു രണ്ടരയ്ക്ക് ശിക്ഷ വിധിക്കും. കലാപ സാധ്യത കണക്കിലെടുത്ത് ജയിലിന് ചുറ്റും ബഹുതല സുരക്ഷാ സംവിധാനമാണ് ഏര്പ്പെടുത്തിയിട്ടുള്ളത്.
ഹരിയാനയിലും, പഞ്ചാബിലും സുരക്ഷ ശക്തമാക്കി. പൊലീസും അര്ധസൈനികരുമാണ് സുരക്ഷയുടെ ഭാഗമായി റോഹ്തക്കിലുള്ളത്. ഡല്ഹി അതിര്ത്തിയില് പൊലീസ് വാഹന പരിശോധന കര്ശനമാക്കി. ചെറുസംഘങ്ങളായി റോത്തക്കിലെത്തി പ്രക്ഷോഭം അഴിച്ചുവിടാന് ഗുര്മീത് അനുയായികള് പദ്ധതിയിടുന്നുവെന്ന സൂചന സുരക്ഷാ ഉദ്യോഗസ്ഥര്ക്കു ലഭിച്ചിട്ടുണ്ട്. റോത്തക്കിലേക്കെത്തുന്നവര് മതിയായ കാരണം ബോധിപ്പിച്ചില്ലെങ്കില് കസ്റ്റഡിയിലെടുക്കുമെന്നു പൊലീസ് അറിയിച്ചു. റോഹ്തക്കില് കര്ഫ്യൂ പ്രഖ്യാപിച്ചിട്ടുണ്ട്. നിരോധനാജ്ഞ നിലനില്ക്കുന്ന പ്രദേശത്ത് സമാധാനാന്തരീക്ഷം തകര്ക്കാന് ശ്രമിക്കുന്നവര്ക്കു വെടിയുണ്ടകളെ നേരിടേണ്ടിവരുമെന്ന് റോത്തക് ഡപ്യൂട്ടി കമ്മിഷണര് അതുല്കുമാര് മുന്നറിയിപ്പു നല്കി.
റോത്തക്കില് വിദ്യാഭ്യാസ സ്ഥാപനങ്ങള്ക്ക് ഇന്ന് അവധി പ്രഖ്യാപിച്ചു. ആക്രമണത്തിനു ജനക്കൂട്ടത്തെ ആഹ്വാനം ചെയ്യാന് സാധ്യതയുള്ള ഏതാനും പേരെ കരുതല് തടങ്കലിലാക്കി. ഡല്ഹി റോത്തക് ഭട്ടിന്ഡ മേഖലയില് ട്രെയിന് സര്വീസ് ഭാഗികമായി നിര്ത്തിവച്ചു. ഉന്നത പൊലീസ് ഉദ്യോഗസ്ഥര് ജയിലിലെത്തി സുരക്ഷാ സന്നാഹങ്ങള് വിലയിരുത്തി.