ദില്ലി: പിഎന്ബി വായ്പ തട്ടിപ്പുമായി ബന്ധപ്പെട്ട് വജ്രവ്യാപാരി നീരവ് മോദിയുടെ സഹോദരന് നേഹല് മോദിക്കെതിരെ ഇന്റര്പോളിന്റെ റെഡ് കോര്ണര് നോട്ടീസ്. ഏതെങ്കിലും രാജ്യത്ത് നെഹല് ദീപക് മോദിയെ കണ്ടെത്തിയാല് അറസ്റ്റ് ചെയ്യണമെന്നാണ് നോട്ടീസ് നിര്ദേശിക്കുന്നതെന്ന് ദേശീയ മാധ്യമങ്ങള് റിപ്പോര്ട്ട് ചെയ്യുന്നു.
സാമ്പത്തിക തട്ടിപ്പ് നടത്തുന്നതിനും തെളിവുകള് നശിപ്പിക്കുന്നതിനും നീരവ് മോദിയെ സഹായിച്ചെന്നാണ് നേഹലിനെതിരെ എന്ഫോഴ്സ്മെന്റ് ഡയറക്ടറേറ്റ് (ഇ.ഡി) ആരോപിക്കുന്നത്. ഇയാള് ഇപ്പോള് യുഎസിലാണെന്നാണ് റിപ്പോര്ട്ടുകള്. തട്ടിപ്പുമായി ബന്ധപ്പെട്ട് തെളിവുകള് നശിപ്പിക്കുന്നതിന് ഉള്പ്പെടെ നേഹല് നീരവ് മോദിയെ സഹായിച്ചതായി എന്ഫോഴ്സ്മെന്റ് ഡയറക്ടറേറ്റ് കണ്ടെത്തിയിരുന്നു. ഇതേ തുടര്ന്ന് നേഹല് മോദിക്കെതിരെ റെഡ് കോര്ണര് നോട്ടീസ് പുറപ്പെടുവിക്കണമെന്ന് എന്ഫോഴ്സ്മെന്റ് ഡയറക്ടറേറ്റ് ഈ വര്ഷത്തിന്റെ തുടക്കത്തില് ഇന്റര്പോളിനോട് ആവശ്യപ്പെട്ടിരുന്നു.
ദുബായിലും ഹോങ് കോങ്ങിലുമുള്ള ഡമ്മി ഡയറക്ടര്മാരുടെ മൊബൈല് ഫോണുകള് നശിപ്പിച്ചതും ഇവര്ക്ക് കെയ്റോയിലേക്ക് ടിക്കറ്റ് തരപ്പെടുത്തി നല്കിയതും നേഹല് മോദിയാണെന്ന് എന്ഫോഴ്സ്മെന്റ് ഡയറക്ടറേറ്റ് പരാതിയില് പറയുന്നു.