സംസ്ഥാനത്ത് മദ്യവില്‍പ്പനയില്‍ നിന്നുള്ള വരുമാനം വര്‍ദ്ധിച്ചു. മുന്‍വര്‍ഷങ്ങളുമായി താരതമ്യപ്പെടുത്തുമ്പോള്‍ 671 കോടിയുടെ വര്‍ദ്ധനവാണ് 2017-18 വര്‍ഷത്തില്‍ ഉണ്ടായിരിക്കുന്നത്. എക്‌സൈസ് മന്ത്രി ടിപി രാമകൃഷ്ണന്‍ നിയമസഭയിലാണ് ഇക്കാര്യം അറിയിച്ചത്. 2014-15 വര്‍ഷത്തില്‍ 8277 കോടി, 2015-16 ല്‍ 9787 കോടി, 2016-17ല്‍ 10353 കോടിയുമാണ് വരുമാനം.
ഇന്ന് ലോക ലഹരി വിരുദ്ധ ദിനമായി ആചരിക്കപ്പെടുമ്പോള്‍ ഈ കണക്കുകള്‍ പ്രകാരം സംസ്ഥാനത്തിന്റെ വരുമാനം വര്‍ദ്ധിക്കുന്നുണ്ടെങ്കിലും മലയാളിയുടെ ആരോഗ്യം നശിക്കുകയാണ്. ക്യാന്‍സര്‍ പോലുള്ള മാരകരോഗങ്ങള്‍ക്കും കരള്‍രോഗത്തിനും മദ്യത്തിന്റെ ഉപയോഗം കാരണമാകുന്നുണ്ട്. സമൂഹത്തെ നശിപ്പിക്കുന്ന ലഹരിയെന്ന വന്‍ വിപത്തിനെതിരെ ശബ്ദമുയര്‍ത്തുമ്പോളും പൂര്‍ണ്ണമായും തുടച്ചുനീക്കാന്‍ കഴിയാത്തത്് ഒരു വരുമാനസ്രോതസ്സ് എന്ന സ്ഥിതി നിലനില്‍ക്കുന്നത് കൊണ്ടുതന്നെയാകണം.
