ലക്നോ: ലോക്ക്ഡൗണിനെ തുടര്‍ന്ന് വീട്ടിലേക്കു നടന്നുപോയ കുടിയേറ്റ തൊഴിലാളി പട്ടിണിയില്‍ മരിച്ചു. വിക്രം എന്ന 60 വയസുകാരനാണ്‌ ഉത്തര്‍പ്രദേശില്‍ മരിച്ചത്.
മഹാരാഷ്ട്രയില്‍നിന്ന് മൂന്നു ദിവസം മുന്പാണ് (വ്യാഴാഴ്ച) വിക്രം മറ്റു കുടുംബാംഗങ്ങള്‍ക്കൊപ്പം സ്വദേശത്തേക്കു യാത്ര ആരംഭിച്ചത്. യാത്ര ആരംഭിച്ചശേഷം വെള്ളിയാഴ്ചയാണ് ഇദ്ദേഹം അവസാനമായി ഭക്ഷണം കഴിച്ചത്.
ട്രക്കിലായിരുന്നു ഉത്തര്‍പ്രദേശിലേക്കുള്ള യാത്ര. ഞായറാഴ്ച പുലര്‍ച്ചെ മൂന്നോടെ ഇവരെ ലക്നോവില്‍നിന്ന് 120 കിലോമീറ്റര്‍ അകലെയുള്ള കനൗജില്‍ ഇറക്കിവിട്ടു. ഇതിനുശേഷം സംഘം സ്വദേശമായ ഹര്‍ദോയിലേക്കു നടന്നു. നടന്നു തുടങ്ങി ഒരു കിലോമീറ്ററിനുള്ളില്‍ വിക്രം തളര്‍ന്നുവീഴുകയും മരിക്കുകയുമായിരുന്നു.
ഭക്ഷണം ലഭിക്കാതെയാണ് വിക്രം മരിച്ചതെന്നും മഹാരാഷ്ട്രയില്‍നിന്നു പുറപ്പെട്ടശേഷം കുറച്ച്‌ ബിസ്കറ്റുകള്‍ മാത്രമാണ് അദ്ദേഹം കഴിച്ചിരുന്നതെന്നും ജില്ലാ ഭരണകൂടത്തിന്‍റെ പ്രതിനിധിയായ ശൈലേഷ് കുമാര്‍ സിംഗ് അറിയിച്ചു.
