കൊച്ചി: അന്തരിച്ച മുന് മന്ത്രി തോമസ് ചാണ്ടിയുടെ സംസ്കാരം ചൊവ്വാഴ്ച ഉച്ചക്ക് രണ്ടിന് ആലപ്പുഴ ചേന്നംകരി സെന്റ് പോള്സ് മാര്ത്തോമ പള്ളി സെമിത്തേരിയില് നടക്കും. സംസ്കാരത്തിന് ശേഷം മൂന്നിന് പള്ളിയങ്കണത്തില് അനുശോചന സമ്മേളനം നടക്കും. തിങ്കളാഴ്ച ഉച്ചക്ക് എന്.സി.പി വര്ക്കിങ് കമ്മിറ്റി അംഗം പ്രഫുല്പട്ടേല് ആശുപത്രിയിലെത്തിയും ദേശീയ അധ്യക്ഷന് ശരത്പവാര്, സുപ്രിയസുലെ എം.പി, ലക്ഷദ്വീപ് എം.പി മുഹമ്മദ് ഫൈസല് എന്നിവര് വൈകീട്ട് വീട്ടിലെത്തിയും അന്ത്യോപചാരം അര്പ്പിക്കും.
ആസ്റ്റര് മെഡ്സിറ്റിയില് സൂക്ഷിച്ചിരിക്കുന്ന ഭൗതികശരീരം തിങ്കളാഴ്ച ഉച്ചക്ക് ആലപ്പുഴക്ക് െകാണ്ടുപോകും. ഉച്ചകഴിഞ്ഞ് മൂന്നു മുതല് അഞ്ചുവരെ ആലപ്പുഴ മുനിസിപ്പല് ടൗണ് ഹാളില് പൊതുദര്ശനത്തിന് വെക്കും. 5.30ന് ആലപ്പുഴ-ചങ്ങനാശ്ശേരി റോഡില് പൂപ്പള്ളിക്ക് സമീപമുള്ള വീട്ടില് എത്തിക്കും. ചൊവ്വാഴ്ച ഉച്ചക്ക് 12ന് വീട്ടില് പ്രാര്ഥന കര്മങ്ങള് ആരംഭിക്കും.
എന്.സി.പി അഖിലേന്ത്യ ജനറല് സെക്രട്ടറി ടി.പി. പീതാംബരന് മാസ്റ്റര്, സംസ്ഥാന സെക്രട്ടറി ജയന്പുത്തന്പുരക്കല്, സേവാദള് ചെയര്മാന് ജോണി തോട്ടക്കര, വി.രാംകുമാര് തുടങ്ങിയവര് തിങ്കളാഴ്ച ഭൗതിക ശരീരത്തെ അനുഗമിക്കും. വ്യവസായ പ്രമുഖന് എം.എ യൂസഫലി, എറണാകുളം ജില്ല കലക്ടര് എസ്.സുഹാസ്, കോണ്ഗ്രസ് വര്ക്കിങ് കമ്മിറ്റി അംഗം പി.സി. ചാക്കോ എന്നിവര് അന്ത്യോപചാരമര്പ്പിക്കാന് എത്തിയിരുന്നു.