ലണ്ടന്‍: മാഞ്ചസ്റ്റര്‍ സിറ്റി ഇംഗ്ലീഷ് പ്രീമിയര്‍ ലീഗ് കിരീടം സ്വന്തമാക്കി. കിരീടപോരാട്ടത്തില്‍ ഒപ്പത്തിനൊപ്പമുണ്ടായ ലിവര്‍ പൂളും അവസാന മത്സരത്തില്‍ ജയിച്ചെങ്കിലും ഒരു പോയിന്റിന്റെ വ്യത്യാസത്തില്‍ സിറ്റി കിരീടം തട്ടിയെടുത്തു. അവസാന ലീഗ് മത്സരത്തില്‍ ബ്രൈറ്റണിനെയാണ് സിറ്റി നിലംപരിശാക്കിയത്.
ഒന്നിനെതിരെ നാലു ഗോളുകള്‍ക്കായിരുന്നു സിറ്റിയുടെ ജയം. അഗ്യൂറോ (28), ലപോര്‍ട്ടെ (38), മഹ്രസ് (63), ഗുണ്ടോഗന്‍ (72) എന്നിവരാണ് സിറ്റിക്കായി ഗോള്‍ നേടിയത്.ബ്രൈറ്റണിന്റെ ആശ്വാസ ഗോള്‍ മുറെയ് (27) നേടി. 2009 ല്‍ മാഞ്ചസ്റ്റര്‍ യുണൈറ്റഡ് കിരീടം നിലനിര്‍ത്തിയതിനു ശേഷം ആദ്യമായാണ് ഒരു ടീം ലീഗ് കിരീടം നില്‍നിര്‍ത്തുന്നത്.
ലിവര്‍ പൂള്‍ എതിരില്ലാത്ത രണ്ടു ഗോളുകള്‍ക്ക് വൂള്‍വര്‍ഹാംടണെയാണ് പരാജയപ്പെടുത്തിയത്. സെനഗലിന്‍റെ സൂപ്പര്‍ സ്ട്രൈക്കര്‍ സാദിയോ മാനെയുടെ ഇരട്ട ഗോളുകളാണ് സിറ്റിക്ക് വിജയമൊരുക്കിയത്. കളിയുടെ പതിനേഴാം മിനിറ്റിലും 81 ാം മിനിറ്റിലുമാണ് മാനെ ലക്ഷ്യം കണ്ടത്. ജയിച്ചാല്‍ മാത്രം കിരീടമെന്ന ജീവന്‍മരണ പോരാട്ടത്തിനിറങ്ങിയ സിറ്റിയും ലിവര്‍പൂളും തീപാറുന്ന പോരാട്ടമാണ് കാഴ്ചവച്ചത്.
പ്രീമിയര്‍ ലീഗില്‍ രണ്ടു ടീമുകള്‍ 90 പോയിന്‍റ് നേടിയിട്ടും കിരീട പോരാട്ടം അവസാന ലീഗ് മത്സരം വരെ നീളുന്നത് ആദ്യമായാണ്. 1992-93ല്‍ പ്രീമിയര്‍ ലീഗ് സ്ഥാപിതമായശേഷം ഒമ്ബതാം തവണയാണ് സീസണിലെ അവസാന ദിനം ചാമ്ബ്യന്‍മാരെ നിര്‍ണയിക്കുന്നത്. സിറ്റി 38 മത്സരങ്ങളില്‍ 98 പോയിന്‍റ് നേടിയപ്പോള്‍ അത്രയും മത്സരങ്ങളില്‍ ലിവര്‍പൂളിന് 97 പോയിന്‍റാണുള്ളത്. മൂന്നാം സ്ഥാനത്തുള്ള ചെല്‍സി ബഹുദൂരം പിന്നിലാണ്. ചെല്‍സിക്ക് 38 മത്സരങ്ങളില്‍ 72 പോയിന്‍റാണുള്ളത്. ടോട്ടനം നാലാമതും (71) ആഴ്സണല്‍ അഞ്ചാമതും (70) മാഞ്ചസ്റ്റര്‍ യുണൈറ്റഡ് (66) ആറാമതുമാണ്.
