പത്തനതിട്ട: തിരുവല്ലയിൽ യുവാവ് നടുറോഡിൽ കോളേജ് വിദ്യാർത്ഥിനിയെ പെട്രോൾ ഒഴിച്ച് തീകൊളുത്തി. അയിരൂർ സ്വദേശിനിയായ യുവതിക്ക് ഗുരുതരമായി പൊള്ളലേറ്റു. കടപ്ര കുമ്പനാട് സ്വദേശി അജിൻ മാത്യു ജോസഫ് അറസ്റ്റിൽ. യുവതിയുടെ വീട്ടുകാർ വിവാഹാഭ്യർത്ഥന നിരസിച്ചതാണ് കാരണം.
ഗുരുതരമായി പൊള്ളലേറ്റ അയിരൂർ സ്വദേശിനിയായ യുവതിയെ പുഷ്പഗിരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. തിരുവല്ല ചിലങ്ക തീയറ്ററിന് സമീപത്തുവച്ചാണ് സംഭവം. രാവിലെ സ്വകാര്യ സ്ഥാപനത്തിൽ പഠിക്കാനെത്തിയ യുവതിയെ റോഡിൽവച്ച് പ്രതി തടഞ്ഞു നിർത്തുകയും പെട്രോൾ ഒഴിച്ച് തീകൊളുത്തുക‍യുമായിരുന്നു. കൈയിൽ കരുതിയിരുന്ന രണ്ട് കുപ്പി പെട്രോളിൽ ഒരു കുപ്പി പെട്രോളാണ് യുവതിയുടെ ശരീരത്തേക്ക് ഒഴിച്ചത്.
തീയാളുന്നത് കണ്ട നാട്ടുകാർ യുവതിയുടെ ശരീരത്തിൽ വെള്ളമൊഴിച്ച് തീ കെടുത്തുകയായിരുന്നു. ഗുരുതരമായി പൊള്ളലേറ്റ പെൺകുട്ടിയെ ആശുപത്രിയിലേക്ക് മാറ്റി.
