തിരുവനന്തപുരം: കെഎസ്ആര്ടിസി എംഡി സ്ഥാനത്ത് നിന്ന് ടോമിന് തച്ചങ്കരിയെ നീക്കിയ സര്ക്കാര് നടപടി സ്വാഗതം ചെയ്ത് ഭരണ-പ്രതിപക്ഷ തൊഴിലാളി യൂണിയനുകള്.
തൊഴിലാളി യൂണിയനുകളെ മോശക്കാരാക്കി ചിത്രീകരിക്കാനാണ് തച്ചങ്കരി എപ്പോഴും ശ്രമിച്ചതെന്നും യൂണിയനുകളെ അധിക്ഷേപിച്ചു കൊണ്ടുള്ള പരിഷ്കരണ നടപടികള് അംഗീകരിക്കാന് കഴിയില്ലെന്നും ഭരണ-പ്രതിപക്ഷ യൂണിയന് പ്രതിനിധികള് പ്രതികരിച്ചു.
കെഎസ്ആര്ടിസി വരുമാനത്തില് നിന്ന് ശമ്പളം നല്കാനായെന്ന തച്ചങ്കരിയുടെ അവകാശവാദം പൊള്ളയാണെന്നും യൂണിയനുകള് ആരോപിച്ചു.
കഴിഞ്ഞ മാര്ച്ച് മാസം വരെ കെഎസ്ആര്ടിസിയുടെ പ്രതിദിന വായ്പാ തിരിച്ചടവ് 3 കോടി രൂപയായിരുന്നു. എന്നാല് ബാങ്ക് കണ്സോര്ഷ്യത്തിലൂടെ ഇത് 20 വര്ഷത്തെ ദീര്ഘകാല വായ്പയായി മാറ്റി. ഇതോടെ ഏപ്രില് മുതല് പ്രതിദിന കടം തിരച്ചടവ് 86 ലക്ഷമായി കുറഞ്ഞു. തത്ഫലമായി പ്രതിമാസ ബാധ്യതയില് 64.2 കോടിയുടെ കുറവുണ്ടായി. ഈ വസ്തുത മറച്ചുവെച്ചാണ് എംഡി വ്യാജ പ്രചാരണം നടത്തിയതെന്ന് യൂണിയനുകള് ആരോപിക്കുന്നു.