തിരുവനന്തപുരം: ഇരുപത്തി മൂന്നാമത് കേരള രാജ്യാന്തര ചലച്ചിത്രമേളയ്ക്ക് ഇന്ന് അനന്തപുരിയില് തിരിതെളിയും. വൈകീട്ട് ആറിന് മുഖ്യമന്ത്രി പിണറായി വിജയന് ഉദ്ഘാടനം ചെയ്യും. മന്ത്രി എ കെ ബാലന് അധ്യക്ഷനാകുന്ന ചടങ്ങില് ബംഗാളി സംവിധായകന് ബുദ്ധദേവ്ദാസ് ഗുപ്ത മുഖ്യാതിഥിയാകും. നടിയും സംവിധായികയുമായ നന്ദിതാ ദാസ്, ചലച്ചിത്ര അക്കാദമി ചെയര്മാന് കമല് തുടങ്ങിയവര് പങ്കെടുക്കും. സമഗ്ര സംഭാവനയ്ക്കുള്ള പുരസ്കാരം പ്രശസ്ത ഇറാനിയന് സംവിധായകനും ജൂറി ചെയര്മാനുമായ മജീദ് മജീദിക്ക് ഉദ്ഘാടന ചടങ്ങില് വച്ച് മുഖ്യമന്ത്രി സമ്മാനിക്കും.
കാന് ചലച്ചിത്രമേളയില് ഉദ്ഘാടന ചിത്രമായിരുന്ന ഇറാനിയന് സംവിധായകന് അഫ്ഗര് ഫര്ഹാദിയുടെ ‘എവരിബഡി നോസ്’ ആണ് ഉദ്ഘാടന ചിത്രം. 72 രാജ്യങ്ങളില്നിന്നായി 164 ചിത്രങ്ങള് മേളയില് പ്രദര്ശനത്തിനെത്തുന്നുണ്ട്. ആദ്യ ദിനം 34 ചിത്രങ്ങളാണ് പ്രദര്ശിപ്പിക്കുന്നത്. ഹോപ്പ് ആന്റ് റീബില്ഡിങ്ങ് വിഭാഗത്തില് ജയരാജിന്റെ വെള്ളപ്പൊക്കത്തില് അടക്കം ആറ് ചിത്രങ്ങള് പ്രദര്ശിപ്പിക്കും. 14 മത്സരചിത്രങ്ങളാണ് മേളയിലുള്ളത്. ഈ.മ.യൗ., സുഡാനി ഫ്രം നൈജീരിയ’ എന്നീ മലയാളചിത്രങ്ങളും മത്സരവിഭാഗത്തില് ഇടം നേടിയിട്ടുണ്ട്. പതിമൂന്ന് തിയേറ്ററുകളിലായി ഡിസംബര് 13 വരെയാണ് മേള.