തിരുവനന്തപുരം: ശബരിമല വിഷയത്തില് മുഖ്യമന്ത്രി വിളിച്ച യോഗത്തില് എന്എസ്എസ് പങ്കെടുക്കില്ലെന്ന് എന്എസ്എസ് ജനറല് സെക്രട്ടറി ജി.സുകുമാരന് നായര്. ഇന്ന് വൈകീട്ടാണ് മുഖ്യമന്ത്രി വിളിച്ച നവോത്ഥാന സംഘടനകളുടെ യോഗം. എസ്എന്ഡിപി തീരുമാനം വ്യക്തമാക്കിയിട്ടില്ല. തീരുമാനം കോര് കമ്മിറ്റി യോഗത്തിന് ശേഷമായിരിക്കുമെന്ന് വെള്ളാപ്പള്ളി നടേശന് പറഞ്ഞു.
എന്എസ്എസ് ആയിരുന്നു യുവതീപ്രവേശത്തെ എതിര്ത്ത് ആദ്യമായി രംഗത്തെത്തിയത്. ശബരിമലയിലെ നിരോധനാജ്ഞ, പൊലീസ് നിയന്ത്രണം, വിധി നടപ്പാക്കാനുള്ള സര്ക്കാരിന്റെ തിടുക്കം എന്നിവയെല്ലാം എന്എസ്എസിനെ ചൊടിപ്പിച്ചിരുന്നു.
നവോത്ഥാനപാരമ്പര്യവും മൂല്യങ്ങളും പിന്തുടരുന്ന സംഘടനകള് ഇന്നത്തെ സാഹചര്യത്തില് ഒന്നിച്ചുനില്ക്കണമെന്നും അതിനായാണ് യോഗം എന്നുമാണ് സര്ക്കാര് നിലപാട്. നിലവിലെ സാമുദായിക സംഘടനകളില് പലതും കേരള നവോത്ഥാനത്തിന് നിര്ണായക പങ്ക് വഹിച്ചവരാണ്. അതിനാലാണ് എന്എസ്എസും എസ്എന്ഡിപിയും അടക്കമുള്ളവരെ ക്ഷണിച്ചതെന്ന് സര്ക്കാര് വ്യക്തമാക്കിയിരുന്നു. യോഗക്ഷേമ സഭാ നേതാക്കളടക്കം നിരവധി സംഘടനകളെയും ചര്ച്ചയ്ക്കു വിളിച്ചിട്ടുണ്ട്.