ന്യൂഡല്ഹി: ശബരിമലയില് സ്ത്രീകള്ക്ക് പ്രവേശനം അനുവദിക്കണമെന്ന ഹര്ജിയില് സുപ്രീംകോടതി ഇന്ന് വിധി പറയും. ചീഫ് ജസ്റ്റിസ് ദീപക് മിശ്ര അദ്ധ്യക്ഷനായ ഭരണഘടനാബെഞ്ച് രാവിലെ 10.30നാണ് സുപ്രധാന വിധി പറയുക.
സ്ത്രീപ്രവേശന നിയന്ത്രണം നീക്കണമെന്നാവശ്യപ്പെട്ട് 2006ല് ഇന്ത്യന് യങ് ലോയേഴ്സ് അസോസിയേഷനാണ് ഹര്ജി നല്കിയത്. പൊതു ആരാധനാ സ്ഥലത്ത് അവന് പോകാമെങ്കില് അവള്ക്കും പോകാമെന്ന് വാദത്തിനിടെ കോടതി നിരീക്ഷിച്ചിരുന്നു.
ക്ഷേത്രപ്രവേശനത്തിനും പ്രാര്ത്ഥനയ്ക്കും സ്ത്രീക്കും പുരുഷനും തുല്യഅവകാശമാണുള്ളതെന്നും ആര്ത്തവത്തിന്റെ പേരിലുള്ള വിലക്ക് ഭരണഘടനാ ധാര്മ്മികതയുടെ ലംഘനമാണെന്നും കോടതി വാക്കാല് പറഞ്ഞിരുന്നു.
ചീഫ് ജസ്റ്റിസ് ദീപക് മിശ്ര സുപ്രീംകോടതിയില്നിന്ന് പടിയിറങ്ങുംമുമ്പുള്ള ചരിത്രപ്രധാനമായ മറ്റൊരുവിധിയാകും ശബരിമല സ്ത്രീ പ്രവേശനം.