കൊച്ചി: പിണറായി വിജയന്റെ നേതൃത്വത്തില് എല്ഡിഎഫ് സര്ക്കാര് അധികാരത്തിലേറിയ ശേഷം സംസ്ഥാനത്ത് നടന്ന ബി.ജെ.പി പ്രവര്ത്തകരുടെ കൊലപാതകങ്ങളില് സിബിഐ അന്വേഷണം വേണമെന്ന ഹര്ജി ഹൈക്കോടതി തള്ളി. ജസ്റ്റിസ് ആന്റണിഡൊമനിക് അധ്യക്ഷനായ ബെഞ്ചിന്റേതാണ് വിധി. എട്ട് ബിജെപി പ്രവര്ത്തകരുടെ കൊലപാതകക്കേസ് സിബിഐ അന്വേഷിക്കണമെന്നായിരുന്നു ഹര്ജിക്കാരുടെ ആവശ്യം. തലശ്ശേരിയിലെ ഗോപാലന് അടിയോടി ട്രസ്റ്റായിരുന്നു ഹൈക്കോടതിയില് ഹര്ജി നല്കിയത്.
ബി.ജെ.പി പ്രവര്ത്തകരായ കണ്ണൂരിലെ രമിത്ത്, ആണ്ടല്ലൂര് സന്തോഷ്, പി.കെ രാമചന്ദ്രന്, പയ്യന്നൂര് ബിജു, കണ്ണൂരിലെ രാധാകൃഷ്ണന്, വിമല, രവീന്ദ്രന്പിള്ള, രാജേഷ് എന്നിവരുടെ കൊലപാതകത്തില് സിബിഐ അന്വേഷണം വേണമെന്നായിരുന്നു ഹര്ജിക്കാര് ചൂണ്ടിക്കാട്ടിയിരുന്നത്. കേസുകളിലെല്ലാം പ്രതികളെ പിടികൂടിയെങ്കിലും ഗൂഢാലോചന പുറത്ത് കൊണ്ട് വരാന് കഴിഞ്ഞില്ല എന്നായിരുന്നു ഹര്ജിക്കാരുടെ ആവശ്യം.
എന്നാല് ഇരകളുടെ ബന്ധുക്കളില് നിന്ന് സിബിഐ അന്വേഷണം വേണമെന്ന ആവശ്യം ആരും ഉന്നയിച്ചിട്ടില്ലെന്നും കേസിന്റെ വിചാരണ വേളയില് കേസ് സിബിഐക്ക് വിടുന്നത് ശരിയല്ലെന്നും സര്ക്കാര് വാദിച്ചു. ഇത് ശരിവെച്ചുകൊണ്ടാണ് സിബിഐ അന്വേഷണമെന്ന ഹര്ജിക്കാരുടെ ആവശ്യം തള്ളിയത്. കേസ് രാഷ്ട്രീയ പ്രേരിതമാണെന്ന് കരുതേണ്ടി വരുമെന്നും കോടതി അഭിപ്രായപ്പെട്ടു.