ചെന്നൈ: കോച്ചുകളില് റിസര്വേഷന് ചാര്ട്ട് പതിക്കുന്നത് ദക്ഷിണ റെയില്വേ അവസാനിപ്പിക്കുന്നു. പരീക്ഷണാടിസ്ഥാനത്തില് ആറ് മാസത്തേക്കാണ് നടപ്പാക്കുന്നത്. എ വണ്, എ, ബി ഗ്രേഡ് സ്റ്റേഷനുകളില് നിന്നു പുറപ്പെടുന്ന ട്രെയിനുകളില് അടുത്ത മാസം ഒന്നു മുതല് ചാര്ട്ട് പതിക്കില്ല. എക്സ്പ്രസ്, മെയില്, ശതാബ്ദി, തുരന്തോ, രാജധാനി, തുടങ്ങിയ ട്രെയിനുകള്ക്കെല്ലാം പുതിയ തീരുമാനം ബാധകമായിരിക്കും. അതേസമയം സ്റ്റേഷനിലെ നോട്ടീസ് ബോര്ഡില് ചാര്ട്ട് പതിക്കുന്നതു തുടരും.
ചെന്നൈ, എഗ്മൂര് സ്റ്റേഷനുകളില് മൂന്നു മാസത്തേക്കു നടപ്പാക്കിയ പരീക്ഷണം വിജയിച്ചതിനെ തുടര്ന്നാണു കൂടുതല് സ്റ്റേഷനുകളിലേക്കു വ്യാപിപ്പിക്കുന്നത്. രാജ്യത്തെ എല്ലാ ട്രെയിനുകളിലും ഘട്ടം ഘട്ടമായി റിസര്വേഷന് ചാര്ട്ട് അവസാനിപ്പിക്കാനാണ് റെയില്വേയുടെ ശ്രമം. യാത്രക്കാര്ക്കു മൊബൈല് ഫോണ് വഴി തല്സമയ വിവരം നല്കുന്ന സംവിധാനം കാര്യക്ഷമമാക്കുമെന്ന് അധികൃതര് അറിയിച്ചു.