തമിഴ്നാട് സ്വദേശി മുരുകന് മരിക്കാനിടയായ സംഭവത്തില് അന്ന് ജോലിയിലുണ്ടായിരുന്ന ഡോക്ടര്മാരെ അറസ്റ്റ് ചെയ്യാന് പൊലീസ് നീക്കം. തിരുവനന്തപുരം മെഡിക്കല് കോളേജ് ആശുപത്രിയിലെ സീനിയര് റസിഡന്റ് ഡോക്ടറേയും രണ്ടാം വര്ഷ പി.ജി വിദ്യാര്ത്ഥിയേയും പൊലീസ് ചോദ്യം ചെയ്തിരുന്നു. ചോദ്യം ചെയ്യല് മണിക്കൂറുകള് നീണ്ടു. ഇവരുടെ അറസ്റ്റ് ഉടന് രേഖപ്പെടുത്തുമെന്നാണ് സൂചന. അറസ്റ്റ് ഭയന്ന് ഇരുവരും മുന്കൂര് ജാമ്യം തേടി.
മെഡിക്കല് കോളേജ് അധികൃതര്ക്ക് വീഴ്ച പറ്റിയെന്ന് ആരോഗ്യ വകുപ്പ് ഡയറക്ടര് ഡോ.ആര്.എല്. സരിതയുടെ നേതൃത്വത്തില് നടത്തിയ അന്വേഷണത്തില് കണ്ടെത്തിയിരുന്നു. ഗുരുതരാവസ്ഥയിലുളള രോഗികളെ കൊണ്ടുവരുമ്പോള് പാലിക്കേണ്ട നടപടിക്രമങ്ങളൊന്നും പാലിച്ചില്ലെന്നും ജീവന് നിലനിര്ത്താനുളള നടപടികള് പാലിക്കാതെ മുരുകന് ചികിത്സ കിട്ടാതിരിക്കാനുളള നടപടികയാണ് ഡോക്ടര്മാര് സ്വീകരിച്ചതെന്നും ഡയറക്ടര് റിപ്പോര്ട്ട് നല്കിയിരുന്നു. മുരുകന് ചികിത്സ നിഷേധിച്ച തിരുവനന്തപുരത്തെയും കൊല്ലത്തെയും ആശുപത്രികള് വലിയ വീഴ്ചയാണ് വരുത്തിയതെന്നും റിപ്പോര്ട്ടില് പറയുന്നു.