ദുബായ് : ലൈഫ് മിഷൻ കേസിൽ ഉയർന്ന വ്യാജറിപ്പോർട്ടുകൾ തള്ളി ലുലു ഗ്രൂപ്പ് ചെയർമാൻ എം.എ യൂസഫലി. ” അത് റിപ്പോർട്ട് ചെയ്യുന്നവരോട് ചോദിച്ചാൽ ക്ലിയർ ആയിട്ട് അറിയും..അതിന് ഞാൻ മറുപടി പറയണ്ട ആവശ്യം ഇല്ലലോ എന്ന് അദ്ദേഹം ദുബായിൽ പറഞ്ഞു. ലൈഫ് മിഷൻ കേസിൽ ഇഡി സമൻസ് അയച്ചെന്ന റിപ്പോർട്ടുകൾ മാധ്യമപ്രവർത്തകർ ശ്രദ്ധയിൽപ്പെടുത്തിയപ്പോഴായിരുന്നു പ്രതികരണം.
65000 ത്തിലധികം പേർ ജോലി ചെയ്യുന്ന സ്ഥാപനമാണ് ലുലു ഗ്രൂപ്പ്. സമൂഹമാധ്യമങ്ങളിലൂടെ വ്യാജപ്രചാരണങ്ങളും വ്യക്തിഹത്യയും നടക്കുന്നു. ഇതൊന്നും കണ്ട് ഭയപ്പെടുന്നവരല്ല ലുലു ഗ്രൂപ്പെന്ന് എം.എ യൂസഫലി വ്യക്തമാക്കി. ശക്തമായ ലീഗൽ ടീം ലുലുഗ്രൂപ്പിനുണ്ട്, കുപ്രാരണങ്ങൾക്കെതിരെ നിയമവഴി മുതിർന്ന അഭിഭാഷകർ നോക്കുന്നുണ്ട്. പാവപ്പെട്ടവരുടെ ക്ഷേമത്തിന് വേണ്ടി പ്രവർത്തിക്കുമ്പോൾ ഇത്തരം പ്രശ്നങ്ങൾ നേരിടേണ്ടി വരും, ഇതിൽ നിന്ന് ഭയപ്പെട്ട് ഓടുന്ന ആളല്ല യൂസഫലിയെന്നും ഇനിയും പാവപ്പെട്ടവരുടെ കാര്യങ്ങളിൽ ഇടപെടുമെന്നും അദ്ദേഹം ചൂണ്ടികാട്ടി.” സമൂഹമാധ്യമങ്ങളിൽ ചിലർ കുത്തിയിരുന്ന് കുറ്റം പറയുകയും , വ്യക്തിഹത്യ നടത്തുകയും ചെയ്യുന്നു..അത് കണ്ട് ചിലർ സന്തോഷിക്കുകയും ചെയ്യുന്നുണ്ട്.. ഇതൊന്നും കണ്ട് ഭയപ്പെടുന്നവരല്ല ഞങ്ങൾ.” .എം.എ യൂസഫലി കൂട്ടിചേർത്തു.
യുപിയിലും ഹൈദരാബാദിലും ചെന്നൈയിലും അഹമ്മദാബാദിലുമായി പുതിയ പ്രൊജക്ടുകൾ വരുന്നു. സന്നദ്ധപ്രവർത്തനങ്ങളും , ബിസിനസുമായി ശക്തമായി മുന്നോട്ട് പോകുമെന്നും , വ്യാജപ്രചാരണങ്ങൾ കാര്യമാക്കുന്നില്ലെന്നും അദ്ദേഹം വ്യക്തമാക്കി.
” ചിലർ നിങ്ങൾക്കുവേണ്ടി സംസാരിക്കുന്നു, മറ്റു ചിലർ നിങ്ങൾക്ക് എതിരെ സംസാരിക്കുന്നു, വാസ്തവത്തിൽ എല്ലാവരും നിങ്ങളെക്കുറിച്ചു സംസാരിക്കുന്നു എന്നതാണ് സത്യം..” വ്യാജപ്രചാരകരോട്, ഈ ബൈബിൾ വാക്യങ്ങളാണ് തനിക്ക് മറുപടിയായി നൽകാനുള്ളതെന്ന് എം.എ യൂസഫലി കൂട്ടിചേർത്തു.
