തിരുവനന്തപുരം: കേരളത്തിൻ്റെ സ്വപ്നപദ്ധതിയായ കെ ഫോൺ ഉപഭോക്താക്കളിലേക്ക് എത്തുന്നു.അതിവേഗ ഇൻറർനെറ്റ് കണക്ഷൻ കേരളവിഷൻ വഴിയാണ് ജനങ്ങളിലേക്ക് എത്തുക. ബിഎസ്എൻഎൽ ഉൾപ്പെടെയുള്ള വൻകിട കമ്പനികളെ പിന്തള്ളി കേരളവിഷന് ടെൻഡർ ലഭിച്ചു. ദക്ഷിണേന്ത്യയിലെ തന്നെ ഏറ്റവും വലിയ ഇൻറർനെറ്റ് സേവനദാതാക്കൾ എന്ന നേട്ടം കൈവരിച്ചതിന് തൊട്ടുപിന്നാലെയാണ് കെ ഫോണിൻ്റെ ടെൻഡർ കേരളവിഷന് ലഭിക്കുന്നത്. കേരളവിഷൻ്റെ അതിവിപുലമായ നെറ്റ്വർക്ക് കൂടി കെ ഫോണിന് വേണ്ടി ഉപയോഗിക്കുന്നതോടുകൂടി പദ്ധതിക്ക് വേഗം കൂടും.
മൂന്നു വർഷത്തിലേറെയായി ഇൻറർനെറ്റ് സേവനം നൽകുന്നവരിൽ നിന്നാണ് സർക്കാർ ടെൻഡർ ക്ഷണിച്ചത്. 30 പേരാണ് ടെൻഡറിൽ പങ്കെടുത്തത്. 9 സർവീസ് പ്രൊവൈഡർമാരുടെ ചുരുക്കപ്പട്ടിക തയ്യാറാക്കി ആണ് പിന്നീട് നടപടികൾ പൂർത്തിയാക്കിയത്.ടെൻഡർ പൂർത്തിയായതോടെ കണക്ഷൻ നൽകുന്നവരുടെ പട്ടിക തയ്യാറാക്കുന്ന പ്രക്രിയയിലേക്ക് കടക്കും. തദ്ദേശ സ്ഥാപനങ്ങൾ നൽകുന്ന ഗുണഭോക്തൃലിസ്റ്റ് അടിസ്ഥാനമാക്കിയാണ് കണക്ഷൻ നൽകുക. ആദ്യ ഘട്ടത്തിൽ 14000 ബിപിഎൽ കുടുംബങ്ങൾക്കാണ് സൗജന്യമായി ഇൻറർനെറ്റ് സേവനം നൽകുക.അതിനു ശേഷം മറ്റുള്ളവർക്ക് കുറഞ്ഞ തുകയ്ക്ക് അതിവേഗ ഇൻറർനെറ്റ് കണക്ഷൻ നൽകും.
സാമൂഹ്യ പ്രതിബദ്ധതയോടെ എന്നും ജനങ്ങൾക്കൊപ്പം നിൽക്കുന്ന കേരളവിഷൻ കെ ഫോൺ കണക്ഷൻ ജനങ്ങളിലേക്ക് എത്തിക്കുന്നതിനായി ഉള്ള നടപടികൾ തുടങ്ങിക്കഴിഞ്ഞു.