ന്യൂഡല്ഹി: കെ.പി.സി.സി വര്ക്കിംഗ് പ്രസിഡന്റുമാരായി മൂന്നു പേരെ നിയോഗിച്ച് എ.ഐ.സി.സി. കൊടിക്കുന്നില് സുരേഷ്, പി.ടി. തോമസ്, ടി. സിദ്ദിഖ് എന്നിവരാണ് പുതിയ വര്ക്കിംഗ് പ്രസിഡന്റുമാര്. അതേസമയം കെ.വി. തോമസിനെ ആ സ്ഥാനത്തുനിന്നും ഒഴിവാക്കി.
മുന് കെ.പി.സി.സി പ്രസിഡന്റ് മുല്ലപ്പളളി രാമചന്ദ്രന്, മുന് വര്ക്കിംഗ് പ്രസിഡന്റ് കെ.വി. തോമസ് എന്നിവരുടെ പ്രവര്ത്തനങ്ങളെ എ.ഐ.സി.സി അഭിനന്ദിച്ചു. വര്ക്കിംഗ് പ്രസിഡന്റുമാരുടെ പേരുകള് അറിയിച്ചുകൊണ്ടുളള വാര്ത്താക്കുറിപ്പില് എ.ഐ.സി.സി അഭിനന്ദനം അറിയിക്കുകയും ഇരുവരുടേയും പേരുകള് പ്രത്യേകം പരാമര്ശിക്കുകയും ചെയ്തിട്ടുണ്ട്.
പാര്ട്ടിക്കുളളിലെ പ്രശ്നങ്ങള് പരിഹരിക്കുന്നതിന്റെ ഭാഗമായാണ് കെ.വി.തോമസിനെ നേരത്തെ വര്ക്കിംഗ് പ്രസിഡന്റായി നിയോഗിച്ചത്. എന്നാല് പുതിയ പട്ടികയില് അദ്ദേഹത്തെ ഒഴിവാക്കി. തോമസിനെ യു.ഡി.എഫ് കണ്വീനറാക്കാന് ആലോചനകളുണ്ടായിരുന്നു. എന്നാല്, താത്പര്യമില്ലെന്ന് അദ്ദേഹം അറിയിച്ചു എന്നാണ് വിവരം.
കെ.പി.സി.സി അദ്ധ്യക്ഷനാകാന് താന് യോഗ്യനാണെന്ന കൊടിക്കുന്നിലിന്റെ പരാമര്ശം നേരത്തെ ഏറെ വിവാദങ്ങള്ക്ക് വഴിവച്ചിരുന്നു. അദ്ദേഹത്തിന്റെ പേര് കെ.പി.സി.സി അദ്ധ്യക്ഷ സ്ഥാനത്തേക്ക് പരിഗണിക്കുന്നതായും റിപ്പോര്ട്ടുകള് പുറത്ത് വന്നിരുന്നു. എന്നാല് കെ. സുധാകരനെ ആ സ്ഥാനത്തേക്ക് തിരഞ്ഞെടുക്കുകയായിരുന്നു.