ചെങ്ങന്നൂര്: കുടുംബ വഴക്കിനെത്തുടര്ന്ന് ഭാര്യയെ വെട്ടി പരിക്കേല്പ്പിച്ച ശേഷം ഭര്ത്താവ് തൂങ്ങി മരിച്ചു. പേരിശേരി ഗ്രേസ് കോട്ടേജില് ജോമോന് (40) ആണ് മരിച്ചത്. വെട്ടേറ്റ ഭാര്യ ജോമോള് ഗുരുതരാവസ്ഥയില് ചികിത്സയിലാണ്.
തിങ്കളാഴ്ച രാത്രി 11.30 ഓടെയാണ് സംഭവം. ജോമോന് മദ്യപിച്ച് ഭാര്യയുമായി വഴക്കുണ്ടാക്കുകയും പിന്നാലെ വെട്ടുകത്തി ഉപയോഗിച്ച് കഴുത്തിനും പുറത്തും കൈയ്ക്കും വെട്ടുകയായിരുന്നു. ആക്രമണത്തിനിടെ ഭാര്യ നിലവിളിച്ച് വീടിന്റെ ചുറ്റുമതില് ചാടിക്കടന്ന് അയല്പക്കത്തെ വീട്ടില് ഓടിക്കയറി.
രക്തത്തില് കുളിച്ച ഭാര്യ പ്രാണനു വേണ്ടി യാചിച്ചു നിലവിളിച്ചതോടെ അയല്ക്കാര് പോലീസില് വിവരം അറിയിച്ചു.
പിന്നാലെ ചെങ്ങന്നൂര് പോലീസ് എത്തി ജോമോളെ സമീപത്തെ സ്വകാര്യ ആശുപത്രിയില് എത്തിച്ചു. നില ഗുരുതരമായതിനാല് അവിടെ നിന്നും തിരുവല്ലയിലെ സ്വകാര്യ മെഡിക്കല് കോളജ് ആശുപത്രിയിലേക്ക് പിന്നീട് മാറ്റി. ആക്രമണത്തിന് ശേഷം പോലീസ് നടത്തിയ തെരച്ചിലിലാണ് ഭര്ത്താവിനെ വീടിനുള്ളില് ഫാനില് തൂങ്ങി മരിച്ച നിലയില് കണ്ടെത്തിയത്.
പോലീസ് നടപടികള്ക്കു ശേഷം മൃതദേഹം മാലക്കരയിലെ ആശുപത്രിയില് കോവിഡ് പരിശോധന നടത്തി. പിന്നീട് മൃതദേഹം ചെങ്ങന്നൂരിലെ സ്വകാര്യ ആശുപത്രി മോര്ച്ചറിയിലേക്ക് മാറ്റി. സംഭവത്തില് ചെങ്ങന്നൂര് പോലീസ് കേസ് രജിസ്റ്റര് ചെയ്തു.