പത്തനംതിട്ട: കുമ്പഴയില് അഞ്ചുവയസ്സുകാരിയുടെ കൊലപാതകവുമായി ബന്ധപ്പെട്ട കേസില് പോലീസുകാരന് സസ്പെന്ഷന്. പത്തനംതിട്ട സ്റ്റേഷനിലെ റെറ്റര് രവിചന്ദ്രനെയാണ് സസ്പെന്ഡ് ചെയ്തത്. കേസിലെ പ്രതിയായ രണ്ടാനച്ഛന് തമിഴ്നാട് രാജപാളയം സ്വദേശി അലക്സ് ചാടി പോയതിനെ തുടര്ന്നാണ് നടപടി.
സിസിടിവി കാമറയുടെ നോട്ടമെത്താത്ത സ്ഥലത്തേക്ക് കൂട്ടിക്കൊണ്ടു പോയി ചോദ്യം ചെയ്യാന് ശ്രമിക്കുന്നതിനിടെയാണ് പുലര്ച്ചെ ഒരു മണിയോടെ പ്രതി ചാടിപ്പോയത്. പിന്നീട് നാട്ടുകാര് പിടികൂടി പോലീസില് ഏല്പ്പിക്കുകയായിരുന്നു. രക്ഷപെടാന് കാരണമായത് സ്റ്റേഷനിലെ റൈറ്ററുടെ പിടിപ്പുകേടാണെന്ന് വ്യക്തമായിരുന്നു.
പൊലീസ് അറസ്റ്റ് ചെയ്ത പ്രതിയെ സ്റ്റേഷനിലെ സെല്ലിലാണ് പാര്പ്പിച്ചിരുന്നത്. അര്ദ്ധരാത്രി പന്ത്രണ്ടര മണിയോടെ പുറത്തെവിടെയോ പോയി വന്ന റൈറ്ററും സീനിയര് സി.പി.ഓയുമായ രവികുമാറിന് സെല്ലില് കിടക്കുന്ന പ്രതിയെ കണ്ടപ്പോള് ഒന്നു കാര്യമായി ചോദ്യം ചെയ്യണമെന്ന് തോന്നി. സെല്ലിനുള്ളിലേക്ക് സി.സി.ടി.വി കാമറയുടെ നോട്ടമെത്തുന്നതിനാല് താനുദ്ദേശിച്ച പോലെ ചോദ്യം ചെയ്യാന് കഴിയില്ലെന്ന് മനസിലാക്കി സെല്ലില് നിന്നിറക്കി എസ്.ഐയുടെ റൂമിലേക്ക് കൊണ്ടു പോയി. അവിടെ എത്തിയതും പ്രതി ഇറങ്ങിയോടുകയായിരുന്നു. മൂത്രമൊഴിക്കാനും ഭക്ഷണം കൊടുക്കാനുമായി പ്രതിയെ പുറത്തിറക്കിയപ്പോള് ഇറങ്ങിയോടിയെന്നാണ് പൊലീസ് പറഞ്ഞത്. സ്റ്റേഷനിലെ സി.സി.ടി.വി പരിശോധിച്ചപ്പോഴാണ് റൈറ്ററുടെ കൃത്യവിലോപം പുറത്തായത്.
രക്ഷപ്പെട്ടോടിയ പ്രതി കുമ്പഴയില്, കൊലപാതകം നടത്തിയ വാടക വീട്ടിലേക്കാണ് പോയത്. അവിടെ പൊലീസിനെ കാവലിട്ടിരുന്നത് കണ്ട് ഇയാള് അവിടെ നിന്നും രക്ഷപെട്ടു. സമീപത്തെ കുറ്റിക്കാട്ടില് ഒളിച്ചിരുന്ന പ്രതിയെ നാട്ടുകാരും പൊലീസും സംഘം ചേര്ന്ന് നടത്തിയ തെരച്ചിലിനൊടുവിലാണ് പിടികൂടിയത്.