ഇടുക്കി: പള്ളിവാസല് പവര്ഹൗസില് പ്ലസ്ടു വിദ്യാര്ഥിനി കൊല്ലപ്പെട്ട സംഭവത്തില് പ്രതിയെന്നു സംശയിക്കുന്ന ബന്ധു അരുണി(അനു-28)നെ തൂങ്ങിമരിച്ച നിലയില് കണ്ടെത്തി. പവര്ഹൗസിനു സമീപമാണ് നീണ്ടപാറ വണ്ടിത്തറയിലാണ് അരുണിന്റെ മൃതദേഹം കണ്ടെത്തിയത്.
പെണ്കുട്ടിയെ മരിച്ച നിലയില് കണ്ടെത്തിയതിനു 150 മീറ്ററിനുള്ളില് ആളൊഴിഞ്ഞ വീടിനു മുന്നിലെ മരത്തിലാണു അരുണിന്റെ മൃതദേഹം കണ്ടെത്തിയത്. പൊലീസ് പല തവണ തിരഞ്ഞ പ്രദേശമാണിത്. തിങ്കളാഴ്ച രാത്രിയാണു അരുണ് ഇവിടെയെത്തി ആത്മഹത്യ ചെയ്തതാണെന്നു പൊലീസ് പറയുന്നു
വണ്ടിത്തറയില് രാജേഷ് – ജെസി ദമ്ബതികളുടെ മകള് രേഷ്മ (17) കുത്തേറ്റു മരിച്ച കേസില് പ്രതിയെന്നു സംശയിക്കുന്ന അനുവിനായി തിരച്ചില് തുടരുന്നതിനിടെയാണ് മൃതദേഹം കണ്ടെത്തിയത്.
ഉളി പോലുള്ള മൂര്ച്ചയേറിയ ആയുധം കൊണ്ട് ഇടതു നെഞ്ചില് കുത്തേറ്റാണ് രേഷ്മ കൊല്ലപ്പെട്ടത്. കൊലയ്ക്ക് ഉപയോഗിച്ച ആയുധം കണ്ടെത്താന് തിങ്കളാഴ്ച ബോംബ് സ്ക്വാഡിന്റെ നേതൃത്വത്തില് മെറ്റല് ഡിറ്റക്ടര് ഉപയോഗിച്ചു കൃത്യം നടന്ന സ്ഥലത്തു പരിശോധന നടത്തി.
7 കിലോമീറ്റര് ചുറ്റളവില് ഡ്രോണ് ഉപയോഗിച്ചു നിരീക്ഷണം നടത്തിയെങ്കിലും കൂടുതല് തെളിവുകളൊന്നും ലഭിച്ചിട്ടില്ല. രേഷ്മയെ കൊലപ്പെടുത്തും എന്നെഴുതിയ കത്ത് അരുണിന്റെ മുറിയില് നിന്നു പൊലീസിനു ലഭിച്ചിരുന്നു. കൃത്യത്തിനു ശേഷം താനും ആത്മഹത്യ ചെയ്യുമെന്നു കത്തില് സൂചിപ്പിച്ചിരുന്നു.