കൊച്ചി: നഗരത്തിലെ ഷോപ്പിംഗ് മാളിൽ യുവനടിയെ യുവാക്കൾ അപമാനിച്ച സംഭവത്തിൽ നടിയുടെ അമ്മയുടെ മൊഴി പോലീസ് രേഖപ്പെടുത്തി. വീട്ടിലെത്തിയാണ് പോലീസ് മൊഴിയെടുത്തത്. നേരത്തെ പോലീസ് നടത്തിയ അന്വേഷണത്തിൽ നടിയെ യുവാക്കൾ അപമാനിക്കുന്നതിന്‍റെ സിസിടിവി ദൃശ്യങ്ങൾ ഷോപ്പിംഗ് മാളിനുള്ളിൽ നിന്നും പോലീസ് കണ്ടെത്തിയിരുന്നു.
കൂടാതെ, സംഭവത്തിൽ വനിതാ കമ്മീഷനും സ്വമേധയ കേസെടുത്തിരുന്നു. നടപടി സ്വീകരിക്കണമെന്നും സിസിടിവി ദൃശ്യങ്ങൾ എത്രയും വേഗം ഹാജരാക്കണമെന്നും വനിതാ കമ്മീഷൻ അധ്യക്ഷ എം.സി. ജോസഫൈൻ പോലീസിന് നിർദേശം നൽകിയിരുന്നു.
കൊച്ചിയിലെ പ്രമുഖ ഷോപ്പിംഗ് മാളിൽ വ്യാഴാഴ്ച വൈകുന്നേരമായിരുന്നു സംഭവം. നടി തന്നെയാണ് ഇക്കാര്യം ഇൻസ്റ്റ്ഗ്രാം അക്കൗണ്ടിലൂടെ അറിയിച്ചത്. കുടുംബത്തോടൊപ്പം ഷോപ്പിംഗ് നടത്തുമ്പോഴാണ് ദുരനുഭവം ഉണ്ടായതെന്ന് പറയുന്നു. രണ്ട് ചെറുപ്പക്കാർ തന്നെ അപമാനിക്കുകയാണ് ചെയ്ത്അവർ അപ്പോൾ തന്നെ അവിടെനിന്നും കടന്നുകളഞ്ഞു. തന്‍റെ സഹോദരി ഇതുകണ്ടെന്നും ഇവർ പറയുന്നു.
ഈ ചെറുപ്പക്കാർ തങ്ങളെ ഹൈപ്പർമാർക്കറ്റിൽവച്ചും പിന്തുടർന്നു. സംസാരിക്കാനും ശ്രമിച്ചു. എന്നാൽ അപ്പോൾ പ്രതികരിക്കാൻ കഴിഞ്ഞില്ല. ഇത്തരക്കാരുടെ മുഖത്തടിക്കുകയാണ് വേണ്ടതെന്നും നടി ഇൻസ്റ്റഗ്രാമിൽ പറയുന്നു.
