ന്യൂഡല്‍ഹി: രാജ്യത്ത് കോവിഡ് വ്യാപനത്തെത്തുടര്‍ന്ന് നിര്‍ത്തിവെച്ച ആഭ്യന്തര വിമാന സര്‍വീസുകള്‍ മേയ് പതിനേഴോടെ പുനരാരംഭിച്ചേക്കുമെന്നു റിപ്പോര്‍ട്ടുകള്‍. വാണിജ്യവിമാനങ്ങളുടെ അവസാനവട്ട തയ്യാറെടുപ്പുകള്‍ പരിശോധിക്കാന്‍ ബ്യൂറോ ഓഫ് സിവില്‍ ഏവിയേഷന്‍ സെക്യൂരിറ്റിയും ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷനും തിങ്കളാഴ്ച വിവിധ വിമാനത്താവളങ്ങള്‍ സന്ദര്‍ശിച്ചെന്ന് ദേശീയമാധ്യമങ്ങള്‍ റിപ്പോര്‍ട്ട് ചെയ്തു. ആഭ്യന്തര സര്‍വീസുകള്‍ പുനരാരംഭിക്കാന്‍ എയര്‍ലൈന്‍ കമ്പനികള്‍ തയാറാണ്. കേന്ദ്രസര്‍ക്കാരിന്‍റെ അനുമതിക്കായി കാത്തിരിക്കുകയാണ് വിമാനക്കന്പനികള്‍. ഡല്‍ഹി, മുബൈ, ബംഗളുരു തുടങ്ങിയ നഗരങ്ങളുമായി ബന്ധപ്പെട്ടായിരിക്കും ആദ്യം സര്‍വീസ് പുനരാരംഭിക്കുയെന്നും റിപ്പോര്‍ട്ടില്‍ പറയുന്നു.
ആദ്യഘട്ടത്തില്‍ 25 ശതമാനം റൂട്ടുകളിലാണു സര്‍വീസ് നടത്തുക. എത്തിച്ചേരാന്‍ രണ്ടുമണിക്കൂറില്‍ താഴെ സമയം വേണ്ടയിടങ്ങളിലേക്കുള്ള സര്‍വീസുകളില്‍ ഭക്ഷണം വിതരണം ചെയ്യില്ല. യാത്രക്കാര്‍ നിര്‍ബന്ധമായും മൊബൈലില്‍ ആരോഗ്യസേതു ആപ്പ് ഡൗണ്‍ലോഡ് ചെയ്ത് ഉപയോഗിക്കണമെന്നും നിര്‍ദേശങ്ങളില്‍ പറയുന്നുണ്ടെന്നാണു റിപ്പോര്‍ട്ടുകള്‍.
