ചെന്നൈ: ചെന്നൈ മദ്രാസ് ക്രിസ്റ്റ്യന് കോളേജില് ഇന്റേണല് മാര്ക്കിന്റെ പേരില് ഉച്ചവെയിലത്ത് ബാസ്ക്കറ്റ് ബോള് കളിപ്പിച്ച പെണ്കുട്ടി കോര്ട്ടില് വീണ് മരിച്ചു. ആരോഗ്യപ്രശ്നങ്ങള് ഉണ്ടെന്ന് പറഞ്ഞിട്ടും അധികൃതര് കൂട്ടാക്കിയില്ലെന്നാണ് ദൃക്സാക്ഷികളായ സഹപാഠികളുടെ വെളിപ്പെടുത്തല്. തമിഴ്നാട് ആനന്ദപുരം സ്വദേശി മഹിമ ജയരാജനാണ് കുഴഞ്ഞു വീണു മരിച്ചത്.
നാലായിരത്തോളം മലയാളി വിദ്യാര്ത്ഥികള് പഠിക്കുന്ന ചെന്നൈയിലെ മദ്രാസ് ക്രിസ്റ്റ്യന് കോളേജില് നടന്ന സംഭവത്തില് സര്വ്വകലാശാലയില് വിദ്യാര്ത്ഥികളുടെ പ്രതിഷേധം തുടരുകയാണ്. സ്പോര്ട്ട്സ് ഫോറം എന്ന പേരില് കൊണ്ടുവന്ന പുതിയ ഇനമാണ് മഹിമ ജയരാജിന്റെ ജീവന് എടുത്തതെന്നാണ് കുട്ടികളുടെ ആക്ഷേപം. ഇന്റേണല് മാര്ക്കിന്റെ പട്ടികയില് സര്വ്വകലാശാല നിര്ദ്ദേശിക്കാത്ത കാര്യങ്ങളാണ് അധികൃതര് വിദ്യാര്ത്ഥികള് മേല് അടിച്ചേല്പിക്കുന്നതെന്നും ഇവര് പറയുന്നു.
ഉച്ചയ്ക്ക് ശേഷം എല്ലാ വിദ്യാര്ത്ഥികളും നിര്ബന്ധപ്പൂര്വ്വം കായികപരിശീലനം നടത്തണമെന്നായിരുന്നു പ്രിന്സിപ്പലിന്റെ ഉത്തരവ്. ഇതനുസരിച്ച് ഉച്ചവെയിലത്ത് ബാസ്ക്കറ്റ് ബോള് കളിക്കാനാണ് മഹിമക്ക് കിട്ടിയ നിര്ദ്ദേശം. തല കറങ്ങുന്നെന്നു പറഞ്ഞിട്ടും അധികൃതര് കൂട്ടാക്കിയില്ലെന്നും തുടര്ന്ന് പെണ്കുട്ടി തളര്ന്നു വീണു മരിക്കുകയായിരുന്നു എന്നുമാണ് റിപ്പോര്ട്ട്. രക്തസമ്മര്ദ്ദം അമിതമായി കുറഞ്ഞതാണ് മഹിമയുടെ മരണകാരണമെന്ന് ഡോക്ടര്മാര് പറഞ്ഞു.