മെക്സിക്കോ: റോയിട്ടേഴ്സ് ഫോട്ടോഗ്രാഫര് ജോസ് ലൂയിസ് ഗോണ്സാലസ് പകര്ത്തിയ അഭയാര്ത്ഥിത്വത്തിന്റെ നിസ്സഹായതയും വേദനയും വിളിച്ചുപറയുന്ന ഒരു ചിത്രമാണിത്.
അമേരിക്കയിലേയ്ക്ക് കടക്കാനെത്തിയ ഗ്വാട്ടിമാല സ്വദേശിനി യുവതിയെയും അവളുടെ 6 വയസ്സുകാരനായ മകനെയും അതിര്ത്തിയില് മെക്സിക്കന് സുരക്ഷാഭടന് തടയുന്നു. അതിര്ത്തി കടന്ന് അമേരിക്കയിലേയ്ക്ക് പ്രവേശിക്കാന് അനുവദിക്കണമെന്ന് അവര് സൈനികനോട് കേണപേക്ഷിക്കുന്നു. തോക്കേന്തി നില്ക്കുന്ന സൈനികനെയും നിലത്തിരുന്ന് ഒരു കൈകൊണ്ട് മകനെ ചേര്ത്തു പിടിച്ച് മറു കൈകൊണ്ട് മുഖംപൊത്തി കരയുന്ന യുവതിയെയും ചിത്രത്തില് കാണാം.
ലെറ്റി പെരെസും അവരുടെ മകന് ആന്തണി ഡയസും 2400ല് അധികം കിലോമീറ്റര് സഞ്ചരിച്ചാണ് ഗ്വാട്ടിമാലയില്നിന്ന് അമേരിക്കന് അതിര്ത്തി പട്ടണമായ സ്യുഡാഡ് ജുവാരസിലെത്തിയത്. മകന്റെ ഭാവിയെ കുറിച്ചോര്ത്താണ് അമേരിക്കയിലേയ്ക്ക് കടക്കാന് അവള് ശ്രമിക്കുന്നത്. അതിനായി ആ സൈനികന്റെ കാലുപിടിക്കാന് അവള് തയ്യാറായിരുന്നു. എന്നാല് ഉത്തരവുകള് അനുസരിക്കുക മാത്രമാണ് താന് ചെയ്യുന്നതെന്നും അതിര്ത്തി കടക്കാന് അനുവദിക്കില്ലെന്നുമായിരുന്നു സൈനികന്റെ നിലപാട്.