മുംബൈ: ക്രിക്കറ്റിലെ യുവരാജാവും പോരാട്ട വീര്യത്തിന്റെ പ്രതിരൂപവുമായ യുവരാജ് സിംഗ് രാജ്യാന്തര ക്രിക്കറ്റില് നിന്ന് വിരമിച്ചു. രാജ്യാന്തര ക്രിക്കറ്റില് നിന്ന് വിരമിച്ചെങ്കിലും വിവിധ രാജ്യങ്ങളിലെ ടി20 ടൂര്ണമെന്റുകളില് 37കാരനായ യുവരാജ് തുടര്ന്നും കളിക്കും.
2000ല് കെനിയക്കെതിരെ ഏകദിന ക്രിക്കറ്റില് അരങ്ങേറിയ യുവരാജ് 304 ഏകദിനങ്ങളില് ഇന്ത്യക്കായി കളിച്ചു. 40 ടെസ്റ്റിലും 58 ടി20 മത്സരങ്ങളിലും ഇന്ത്യന് ജേഴ്സി അണിഞ്ഞ യുവരാജ് 2007ലെ ടി20 ലോകകപ്പ് നേട്ടത്തിലും 2011ലെ ഏകദിന ലോകകപ്പ് നേട്ടത്തിലും നിര്ണായക പങ്കുവഹിച്ചു. 2011ലെ ഏകദിന ലോകകപ്പില് 362 റണ്സും 15 വിക്കറ്റും സ്വന്തമാക്കിയ യുവിയായിരുന്നു ഇന്ത്യ കിരീടം നേടിയപ്പോള് ടൂര്ണമെന്റിന്റെ താരം.