ആലുവയില് മര്ദ്ദനമേറ്റ കുട്ടിയുടെ മാതാപിതാക്കള്ക്കെതിരെ വധശ്രമത്തിന് കേസെടുത്തു. ജാര്ഖണ്ഡ് സ്വദേശികളായ കുട്ടിയുടെ മാതാപിതാക്കളെ കസ്റ്റഡിയില് എടുത്തു.
ജുവനൈല് ജസ്റ്റിസ് ആക്ട് പ്രകാരമുള്ള വകുപ്പുകളും മാതാപിതാക്കള്ക്കെതിരെ ചുമത്തിയിട്ടുണ്ട്.
അതേസമയം തലയ്ക്ക് ഗുരുതരമായി പരിക്കേറ്റ മൂന്ന് വയസുകാരന്റെ ശസ്ത്രക്രിയ പൂര്ത്തിയായി. തലയോട്ടിക്കും തലച്ചോറിനും പരിക്കേറ്റിട്ടുണ്ട്. കുട്ടിയുടെ നില അതീവ ഗുരുതരമായി തുടരുകയാണെന്ന് ആശുപത്രി അധികൃതര് വ്യക്തമാക്കി. കുഞ്ഞിന്റെ തലച്ചോറിനുള്ളിലെ രക്തസ്രാവം ഇതുവരെ നിലച്ചിട്ടില്ല. മരുന്നുകളോടും കുട്ടിയുടെ ശരീരം പ്രതികരിക്കുന്നില്ലെന്ന് ഡോക്ടര്മാര് വ്യക്തമാക്കി. കുട്ടി വെന്റിലേറ്ററില് തുടരുകയാണ്.
എറണാകുളത്ത് താമസിക്കുന്ന ജാര്ഖണ്ഡ് സ്വദേശിയായ കുട്ടിയെ തലയ്ക്ക് പരിക്കേറ്റ് അതീവ ഗുരുതരാവസ്ഥയില് ഇന്നലെ വൈകീട്ടാണ് ആശുപത്രിയില് പ്രവേശിപ്പിച്ചത്. വീടിന്റെ ടെറസില് നിന്ന് വീണാണ് കുഞ്ഞിന് പരിക്കേറ്റതെന്നാണ് ആശുപത്രിയിലെത്തിച്ച മാതാപിതാക്കള് പറയുന്നത്. എന്നാല് പരിശോധനയില് കുട്ടിക്ക് ക്രൂരമായ പീഡനമേറ്റതായി കണ്ടെത്തിയിട്ടുണ്ട്. കുഞ്ഞിന്റെ പൃഷ്ഠ ഭാഗത്ത് പൊള്ളലേറ്റ പാടുകളുണ്ട്. കാലുകളില് മുറിവേറ്റ പാടുകളുമുണ്ടായിരുന്നു. തുടര്ന്ന് ആശുപത്രി അധികൃതര് പോലീസിനെ വിവരമറിയിക്കുകയായിരുന്നു.