ന്യൂഡല്ഹി: റഫാല് കേസില് പുതിയ രേഖകള് പരിശോധിക്കാനാകില്ലെന്ന് സുപ്രീം കോടതി. ദ ഹിന്ദു മുന് എഡിറ്റര് എന് റാം നല്കിയ കത്ത് പരിഗണിക്കാന് ചീഫ് ജസ്റ്റിസിനോട് പ്രശാന്ത് ഭൂഷണ് ആവശ്യപ്പെട്ടപ്പോഴാണ് കോടതി ഇക്കാര്യം പറഞ്ഞത്. പുനഃപരിശോധന ഹര്ജി ആയതിനാല് പഴയ രേഖകള് മാത്രമെ പരിശോധിക്കാനാകൂവെന്നും കോടതി അറിയിച്ചു. ശരിയായ രേഖകള് പരിശോധിച്ചിരുന്നെങ്കില് കേസിലെ വിധി മറ്റൊന്നാകുമായിരുന്നുവെന്നും പ്രശാന്ത് ഭൂഷണ് കോടതിയില് വാദിച്ചു.
അതേസമയം എന് റാമിനും പ്രശാന്ത് ഭൂഷണുമെതിരെ ശക്തമായ ആരോപണവുമായി കേന്ദ്രസര്ക്കാര് രംഗത്തെത്തി. റഫാല് കേസുമായി ബന്ധപ്പെട്ട് എന് റാം, പ്രശാന്ത് ഭൂഷണ് എന്നിവര് ഉയര്ത്തിക്കാട്ടുന്നത് പ്രതിരോധമന്ത്രാലയത്തില്നിന്ന് മോഷ്ടിച്ച രേഖകളാണെന്ന് അറ്റോര്ണി ജനറല് കെ.കെ. വേണുഗോപാല് ആരോപിച്ചു. മോഷ്ടിച്ച രേഖകളെ ആധാരമാക്കിയാണ് വാദവും വാര്ത്തകളും വരുന്നത്. ഇത് കോടതി നടപടികളെ സ്വാധീനിക്കാനാണെന്നും കോടതിയലക്ഷ്യത്തിന് നടപടിയെടുക്കണമെന്നും കെ.കെ വേണുഗോപാല് വാദിച്ചു. രേഖകള് മോഷ്ടിക്കപ്പെട്ടതുമായി ബന്ധപ്പെട്ട് മുതിര്ന്ന് ഉദ്യോഗസ്ഥര്ക്കെതിരെ അന്വേഷണം നടക്കുകയാണ് ഇതുമായി ബന്ധപ്പെട്ട് രണ്ടു മാധ്യമപ്രവര്ത്തകര്ക്കും ഒരു മുതിര്ന്ന അഭിഭാഷകര്ക്കുമെതിരെ ക്രിമിനല് നടപടിയുണ്ടാകുമെന്നും അദ്ദേഹം കോടതിയെ അറിയിച്ചു.