ശബരിമലയിലെ നിരോധനാജ്ഞ പിന്വലിക്കണമെന്നാവശ്യപ്പെട്ട് പ്രതിപക്ഷം നടുത്തളത്തിലിറങ്ങി ബഹളം വച്ചതിന് തുടര്ന്ന് നിയമസഭ ഇന്നത്തേക്കു പിരിഞ്ഞു. ശബരിമലയിലെ 144 പിന്വലിക്കുക എന്നെഴുതിയ പ്ലക്കാര്ഡുകളുമായാണ് പ്രതിപക്ഷാംഗങ്ങള് നടുത്തളത്തിലിറങ്ങിയത്. പിന്നീട് സ്പീക്കറുടെ ഡയസിനു മുന്നിലെത്തി ബഹളം വെച്ചു.
ശൂന്യവേളയില് പ്രശ്നം അവതരിപ്പിക്കാമെന്നും സര്ക്കാര് മറുപടി നല്കുമെന്നും സ്പീക്കര് വ്യക്തമാക്കിയിരുന്നു. എല്ലാ ദിവസവും സഭാനടപടികള് തടസ്സപ്പെടുത്തുന്നത് ശരിയല്ലെന്നും സഭാനടപടികളോട് സഹകരിക്കാമെന്ന് പ്രതിപക്ഷം ഉറപ്പു നല്കിയിരുന്നതായും സ്പീക്കര് ശ്രീരാമകൃഷ്ണന് പറഞ്ഞു. എന്നാല് പ്രതിപക്ഷം ബഹളം തുടര്ന്നതോടെ ചോദ്യോത്തരവേള റദ്ദാക്കുകയും ഇതിന് പിന്നാലെ നിയമസഭ പിരിയുകയുമായിരുന്നു.
നിയമസഭ തുടങ്ങുന്നതിന് മുമ്പ് സ്പീക്കര് പി ശ്രീരാമകൃഷ്ണനുമായി പ്രതിപക്ഷ നേതാവ് ചെന്നിത്തല കൂടിക്കാഴ്ച നടത്തിയിരുന്നു. ശബരിമല വിഷയവുമായി ബന്ധപ്പെട്ട് നിയമസഭയ്ക്കു മുന്നില് സത്യഗ്രഹം ചെയ്യുന്ന എംഎല്എമാരുടെ സമരം അവസാനിപ്പിക്കാന് സര്ക്കാര് ഇടപെടണമെന്നും നിരോധനാജ്ഞ പിന്വലിക്കണമെന്നും ആവശ്യപ്പെട്ടായിരുന്നു കൂടിക്കാഴ്ച. എന്നാല് സര്ക്കാരിന്റെ ഭാഗത്തുനിന്ന് അനുകൂല നിലപാടുണ്ടാകാത്ത സാഹചര്യത്തിലാണ് പ്രതിപക്ഷം പ്രതിഷേധവുമായി രംഗത്തെത്തിയത്.