ആലപ്പുഴ: പ്രതിഷേധം ശക്തമായതിനെ തുടര്ന്ന് സംസ്ഥാന സ്കൂള് കലോത്സവത്തില് ദീപാ നിശാന്ത് ഉള്പ്പടെയുള്ളവര് നടത്തിയ മൂല്യനിര്ണയം റദ്ദാക്കി. ഹൈസ്കൂള് വിഭാഗം ഉപന്യാസരചനാ മത്സരത്തിന്റെ മൂല്യനിര്ണയമാണ് റദ്ദാക്കിയത്. സംസ്ഥാനതല അപ്പീല് കമ്മറ്റിയുടേതാണ് തീരുമാനം. തുടര്ന്ന് ഭാഷാസാഹിത്യ വിഭാഗം വിദഗ്ധനും അപ്പീല് ജൂറി അംഗവുമായ കഥാകൃത്ത് സന്തോഷ് ഏച്ചിക്കാനം പുനര്മൂല്യനിര്ണയം നടത്തി.
പുലര്ച്ചെ ഒരു മണിവരെ നീണ്ട യോഗത്തിലാണ് പുനര്മൂല്യനിര്ണയം നടത്താന് അപ്പീല് കമ്മിറ്റി തീരുമാനിച്ചത്. കവിതാമോഷണ വിവാദത്തില്പ്പെട്ട ദീപ, മൂല്യനിര്ണയം നടത്തുന്നതിനെതിരെ കലോത്സവവേദിയില് ശക്തമായ പ്രതിഷേധം ഉയര്ന്നിരുന്നു.
പ്രതിപക്ഷ യുവജന, വിദ്യാര്ഥി സംഘടനകള് പ്രതിഷേധവുമായി രംഗത്തുവന്നു. ദീപാ നിശാന്ത് മൂല്യനിര്ണയത്തില് പങ്കെടുക്കുന്നതിനെതിരേ കെ.എസ്.യു രേഖാമൂലം വിദ്യാഭ്യാസമന്ത്രിക്ക് പരാതി നല്കുകയും ചെയ്തു. ഇതിനെത്തുടര്ന്നാണ് പുനര്മൂല്യ നിര്ണയം നടത്താന് കലോത്സവ അപ്പീല് കമ്മിറ്റി തീരുമാനിച്ചത്.