തിരുവനന്തപുരം: ശബരിമല സ്ത്രീപ്രവേശന വിഷയത്തില് ദേവസ്വം ബോര്ഡ് വിളിച്ച ചര്ച്ച പരാജയപ്പെട്ടു. തങ്ങള് ഉന്നയിച്ച ആവശ്യങ്ങളില് ഒന്നുപോലും ബോര്ഡ് അംഗീകരിച്ചില്ലെന്ന് പന്തളം രാജകുടുംബം അറിയിച്ചു. ഇന്ന് തന്നെ ഹര്ജി നല്കണമെന്നാണ് തങ്ങള് ബോര്ഡിനോട് ആവശ്യപ്പെട്ടതെന്നും എന്നാല് 19ന് ചേരുന്ന യോഗത്തില് മാത്രമേ ഇത് സംബന്ധിച്ച തീരുമാനം എടുക്കാനാകൂ എന്നാണ് ബോര്ഡ് വ്യക്തമാക്കിയതെന്നും രാജകുടുംബം പ്രതിനിധി ശശികുമാര് പറഞ്ഞു.
അതേസമയം ശബരിമല യുവതീപ്രവേശത്തില് സര്ക്കാര് പുനഃപരിശോധനാ ഹര്ജി നല്കില്ലെന്ന് മുഖ്യമന്ത്രി വ്യക്തമാക്കി. വിധി മറികടക്കാന് നിയമ നിര്മാണമില്ല. വിശ്വാസികളെ ആരും തടയരുത്. ക്രമസമാധാന പ്രശ്നങ്ങള് ശക്തമായി തന്നെ നേരിടും. സമരക്കാര് പ്രശ്നങ്ങള് ഉണ്ടാക്കിയാല് താന് എങ്ങനെ ഉത്തരവാദിയാകുമെന്നും മുഖ്യമന്ത്രി ചോദിച്ചു. മാധ്യമങ്ങളോടു സംസാരിക്കുകയായിരുന്നു മുഖ്യമന്ത്രി.
സുപ്രീംകോടതിയില് സര്ക്കാര് നേരത്തെ നല്കിയ സത്യവാങ്മൂലത്തില് ഹിന്ദു ധര്മശാസ്ത്ര പണ്ഡിതരുടെ കമ്മിഷന്വച്ച് അഭിപ്രായം തേടണം എന്നു പറഞ്ഞിരുന്നു. സര്ക്കാരിന്റെ അഭിപ്രായം അതാണ്. സര്ക്കാരിനു പുരുഷനും സ്ത്രീയും തമ്മില് വ്യത്യാസമില്ല. പുരുഷനുള്ള എല്ലാ അവകാശവും സ്ത്രീക്കും ഉണ്ട്. വിശ്വാസികള്ക്ക് സര്ക്കാര് സംരക്ഷണം നല്കും. അതിന് എതിരു നില്ക്കുന്നവരെ ഒരുതരത്തിലും പ്രോത്സാഹിപ്പിക്കില്ല. ശബരിമലയില് വിശ്വാസികള് പോയി ശാന്തമായി തിരിച്ചു വരികയാണ് പതിവ്. അതിന് സൗകര്യം ഏര്പ്പെടുത്തിയിട്ടുണ്ട്. അതിന് വിരുദ്ധമായി കാര്യങ്ങള് ഉണ്ടായാല് നടപടി സ്വീകരിക്കുമെന്നും മുഖ്യമന്ത്രി പറഞ്ഞു.