കോട്ടയം: ജലന്ധര് മുന് ബിഷപ്പ് ഫ്രാങ്കോ മുളയ്ക്കല് പ്രതിയായ ബലാത്സംഗകേസിലെ അനുബന്ധ കേസുകള് ക്രൈംബ്രാഞ്ചിന് കൈമാറി. സാക്ഷികളെ സ്വാധീനിക്കാന് ശ്രമിച്ച കേസും കന്യാസ്ത്രീയുടെ ചിത്രം പ്രചരിപ്പിച്ച കേസുമാണ് കോട്ടയം ജില്ലാ ക്രൈംബ്രാഞ്ചിന് കൈമാറിയത്. ക്രൈംബ്രാഞ്ച് ഡി.വൈ.എസ്.പി ഗിരീഷ് പി.സാരഥിയ്ക്കാണ് അന്വേഷണചുമതല.
ബിഷപ്പിനെതിരായ പരാതി പിന്വലിക്കാന് കന്യാസ്ത്രീകളെ ഫോണില് വിളിച്ച് സ്വാധീനിക്കാന് ശ്രമിച്ചതിന് വൈദികന് ജെയിംസ് എര്ത്തലിനെതിരെ എടുത്ത കേസും മിഷണറീസ് ഓഫ് ജീസസ് നടത്തിയ അന്വേഷണ റിപ്പോര്ട്ടിനെ അടിസ്ഥാനമാക്കി മാധ്യമങ്ങള്ക്ക് നല്കിയ പത്രക്കുറിപ്പിനോടൊപ്പം പീഡനത്തിന് ഇരയായ കന്യാസ്ത്രീയുടെ ചിത്രം ഉള്പ്പെടുത്തിയ കേസുമാണ് ക്രൈംബ്രാഞ്ച് അന്വേഷിക്കുക. അന്വേഷണ ഉദ്യോഗസ്ഥനായ വൈക്കം ഡിവൈഎസ്പിയുടെ ജോലി ഭാരം കണക്കിലെടുത്താണ് നടപടിയെന്നാണ് വിശദീകരണം.