ചെന്നൈ: മുല്ലപ്പെരിയാര് അണക്കെട്ടിലെ ജലനിരപ്പ് 142 അടിയായി തന്നെ നിലനിര്ത്തുമെന്ന് തമിഴ്നാട് മുഖ്യമന്ത്രി എടപ്പാടി പളനിസ്വാമി. അണക്കെട്ടിലെ ജലനിരപ്പ് കുറയ്ക്കണമെന്ന ആവശ്യവുമായി കേരള മുഖ്യമന്ത്രി പിണറായി വിജയന് കഴിഞ്ഞ ദിവസം കത്ത് അയച്ചിരുന്നു. ഇതിനു മറുപടിയാണ് തമിഴ്നാട് മുഖ്യമന്ത്രി നല്കിയത്.
സുരക്ഷയുടെ എല്ലാ വശങ്ങളും വിദഗ്ധര് വിലയിരുത്തിയ ശേഷമാണ് മറുപടിയെന്നും കൊണ്ടുപോകാന് സാധിക്കുന്ന അത്രയും വെള്ളം നിലവില് കൊണ്ടുപോകുന്നുണ്ടെന്നും കത്തില് പറയുന്നു.
കേരളത്തിന്റെ വൃഷ്ടിപ്രദേശങ്ങള് പരിശോധിക്കാന് തമിഴ്നാട്ടില്നിന്നുള്ള ഉദ്യോഗസ്ഥരെ കേരളം അനുവദിക്കുന്നില്ല. ഈ പരിശോധന നടത്തിയാല് മാത്രമേ എത്ര അടി ജലം ഡാമിലെത്തുമെന്ന് കണക്കാക്കാന് സാധിക്കുകയുള്ളൂ. മുലപ്പെരിയാര് ഡാം പരിസരങ്ങളില് വൈദ്യുതി പുനഃസ്ഥാപിക്കുന്നതിന് 1.65 കോടി രൂപ തമിഴ്നാട് കെഎസ്ഇബിയ്ക്ക് നല്കിയിട്ടുണ്ട്. എന്നാല് വൈദ്യുതി പുനഃസ്ഥാപിക്കുന്നത് സംബന്ധിച്ച് കെഎസ്ഇബിയില് നിന്ന് അറിയിപ്പൊന്നും ലഭിച്ചിട്ടില്ലെന്നും എടപ്പാടി കത്തില് പറയുന്നു.