വില വര്ദ്ധനയുടെ സാഹചര്യത്തില് സംസ്ഥാനം ഇന്ധന തീരുവ ഒഴിവാക്കണമെന്നാവശ്യപ്പെട്ട് പ്രതിപക്ഷം നിയമസഭയില് അടിയന്തര പ്രമേയത്തിന് നോട്ടീസ് നല്കി. തിരുവഞ്ചൂര് രാധാകൃഷ്ണനാണ് നോട്ടീസ് നല്കിയത്. എന്നാല് നികുതി വരുമാനം കുറഞ്ഞ സാഹചര്യത്തില് ഇന്ധന തീരുവ കുറയ്ക്കാനാകില്ലെന്ന് ധനമന്ത്രി തോമസ് ഐസക്ക് പറഞ്ഞു. ഇന്ധന തീരുവ ഉയര്ത്തുന്ന കേന്ദ്ര സര്ക്കാര് നടപടി ബാങ്ക് കൊള്ളയ്ക്ക് തുല്യമാണെന്ന് തോമസ് ഐസക് പറഞ്ഞു.
ഇന്ധന വില കൂടുമ്പോഴൊന്നും വില കുറയ്ക്കുന്ന കീഴ് വഴക്കം സംസ്ഥാനത്തില്ല. യുഡിഎഫ് സര്ക്കാരിന്റെ കാലത്ത് നാലു തവണ നികുതി കുറച്ചപ്പോള് 13 തവണയാണ് ഇന്ധന വില കൂട്ടിയത്. യുപിഎ സര്ക്കാരിന്റെ കാലം കഴിഞ്ഞ് ഒരു ഘട്ടത്തിലും യുഡിഎഫ് സര്ക്കാര് നികുതി കുറച്ചില്ലെന്നും ധനമന്ത്രി കൂട്ടിച്ചേര്ത്തു.
കിഫ്ബിക്ക് പണമുണ്ടാക്കാനാണ് ഇന്ധന സെസ്സ് ഒഴിവാക്കാത്തതെന്ന് തിരുവഞ്ചൂര് ആരോപിച്ചു. ഡീസലിന് ഏറ്റവും കൂടുതല് വില ഈടാക്കുന്നത് കേരളത്തിലാണെന്നും തിരുവഞ്ചൂര് കുറ്റപ്പെടുത്തി.