പഴയ സാരി, ഉപേക്ഷിക്കപ്പെട്ട ടിന് ഷീറ്റുകള് തുടങ്ങിയവ കൊണ്ട് നിര്മ്മിച്ച പവലിയന്റെ അസാമാന്യമായ സൗന്ദര്യബോധം കാഴ്ചക്കാരന് അനുഭവപ്പെട്ടു.
കൊച്ചി: എന്ഡിടിവി ഡിസൈന് ആന്ഡ് ആര്ക്കിടെക്ചര് പ്രൊജക്ട് ഓഫ് ദി ഇയര് പുരസ്കാരം കൊച്ചി-മുസിരിസ് ബിനാലെ മൂന്നാം ലക്കത്തിലെ (2016-17) പവലിയന്. സ്ഥാപനങ്ങളിലെ മികച്ച പദ്ധതിക്കുള്ള പുരസ്കാരവും ബിനാലെ പവലിയനാണ്. സ്തപതിയിലെ പ്രിന്സിപ്പല് ആര്ക്കിടെക്ട് ടോണി ജോസഫാണ് ഈ പവലിയന് രൂപകല്പന ചെയ്തത്.
ഡിസൈന്, സൗന്ദര്യബോധം, സുസ്ഥിരം, സംരക്ഷണം, എന്നീ മേഖലകളിലെ പ്രകടനം വിലയിരുത്തിയാണ് പുരസ്കാരത്തിനായി തെരഞ്ഞെടുപ്പ് നടത്തിയത്. കൊച്ചിയിലെ സാഹചര്യത്തെ വ്യക്തമായി മനസിലാക്കിയതിലൂടെയാണ് സ്തപതിയുടെ വാസ്തുകല ഡിസൈന് ഉരുത്തിരിഞ്ഞു വന്നത്. പ്രദേശത്തിന്റെ പരമ്പരാഗതമായ അറിവുകളില് രൂഢമൂലമാണ് ഈ രൂപകല്പനയുടെ ഉത്ഭവം. ഇതിനെ ആധുനിക കാലവുമായി സമന്വയിപ്പിക്കുകയും ചെയ്തു.
വാസ്തുശില്പ കലയില് അസംസ്കൃത വസ്തുക്കള് കൊണ്ട് സൃഷ്ടിച്ച താത്കാലികത്വമാണ് ഈ പവലിയനെ വ്യത്യസ്തമാക്കിയതെന്ന് കൊച്ചി ബിനാലെ ഫൗണ്ടേഷന് പ്രസിഡന്റ് ബോസ് കൃഷ്ണമാചാരി പറഞ്ഞു. പഴയ സാരി, ഉപേക്ഷിക്കപ്പെട്ട ടിന് ഷീറ്റുകള് തുടങ്ങിയവ കൊണ്ട് നിര്മ്മിച്ച പവലിയന്റെ അസാമാന്യമായ സൗന്ദര്യബോധം കാഴ്ചക്കാരന് അനുഭവപ്പെട്ടു. കേരളത്തിലെ ജനങ്ങളുടെയും സര്ക്കാരിന്റെയും, അഭ്യുദയകാംക്ഷികളുടെയും പിന്തുണയാണ് ഈ പുരസ്കാരലബ്ധിക്കു പിന്നിലെന്നും അദ്ദേഹം കൂട്ടിച്ചേര്ത്തു.
കൊച്ചി ബിനാലെ മൂന്നാം ലക്കത്തില് പങ്കെടുത്ത ആര്ക്കിടെക്ട് കൂടിയാണ് ടോണി ജോസഫ്. പൂര്ണമായും കൊച്ചിയില് നിന്ന് ശേഖരിച്ച പുന: സംസ്കൃത ഉത്പന്നങ്ങള് കൊണ്ടായിരുന്നു നിര്മ്മാണം. 4,157 ചതുരശ്ര അടി വിസ്തീര്ണമുള്ള ശീതീകരിച്ച പവലിയനില് ഒരുക്കിയ ആംഫി തിയേറ്ററില് 300 പേരെ ഉള്ക്കൊള്ളിക്കാനാകുമായിരുന്നു. പശ്ചിമ കൊച്ചിയിലെ ആളൊഴിഞ്ഞ പാണ്ടിക ശാലകളും നശിച്ചു തുടങ്ങിയ ചരിത്ര ശേഷിപ്പുകളുമാണ് ഇത്തരമൊരു പവലിയന്റെ ആശയത്തിനു പിന്നില് പ്രവര്ത്തിച്ചത്.