ഗുവാഹാട്ടി: ദക്ഷിണാഫ്രിക്കയ്ക്കെതിരായ ട്വന്റി 20 പരമ്പര സ്വന്തമാക്കി ഇന്ത്യ. ഗുവാഹാട്ടിയില് നടന്ന രണ്ടാം മത്സരത്തില് ദക്ഷിണാഫ്രിക്കയെ 16 റണ്സിന് തോല്പ്പിച്ചാണ് ഇന്ത്യ ഒരു മത്സരം ശേഷിക്കേ പരമ്പര (2-0) സ്വന്തമാക്കിയത്. ഇതാദ്യമായാണ് ദക്ഷിണാഫ്രിക്കയ്ക്കെതിരേ നാട്ടില് ഇന്ത്യ ഒരു ട്വന്റി 20 പരമ്പര ജയിക്കുന്നത്. ഇന്ത്യ ഉയര്ത്തിയ 238 റണ്സ് വിജയലക്ഷ്യം പിന്തുടര്ന്ന ദക്ഷിണാഫ്രിക്കയ്ക്ക് മൂന്ന് വിക്കറ്റ് നഷ്ടത്തില് 221 റണ്സെടുക്കാനേ സാധിച്ചുള്ളൂ.
സെഞ്ചുറി നേടിയ മില്ലര് 47 പന്തില് നിന്ന് ഏഴ് സിക്സും എട്ട് ഫോറുമടക്കം 106 റണ്സോടെ പുറത്താകാതെ നിന്നു. 48 പന്തുകള് നേരിട്ട ഡിക്കോക്ക് നാല് സിക്സും മൂന്ന് ഫോറുമടക്കം 69 റണ്സെടുത്തു.
നേരത്തെ ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ ഇന്ത്യ തകര്ത്തടിച്ച ബാറ്റര്മാരുടെ മികവില് 20 ഓവറില് മൂന്ന് വിക്കറ്റ് നഷ്ടത്തില് 237 റണ്സെടുത്തിരുന്നു.
കെ.എല് രാഹുല്, രോഹിത് ശര്മ, സൂര്യകുമാര് യാദവ്, വിരാട് കോലി എന്നിവരുടെ തകര്പ്പന് ഇന്നിങ്സുകളാണ് ഇന്ത്യയെ കൂറ്റന് സ്കോറിലെത്തിച്ചത്. ട്വൻ്റി20 ക്രിക്കറ്റിൻ്റെ ചരിത്രത്തിൽ 11,000 റൺസ് നേടുന്ന ആദ്യ ഇന്ത്യൻ ബാറ്ററായി വിരാട് കോലി.