ധാക്ക: പ്രധാനമന്ത്രി നരേന്ദ്രമോദിയുടെ സന്ദര്ശനത്തിനിടെയുണ്ടായ പ്രതിഷേധങ്ങള്ക്കിടെ ബംഗ്ലാദേശില് നാല് പേര് കൊല്ലപ്പെട്ടു. പൊലീസുമായുള്ള സംഘര്ഷത്തിലാണ് നാല് പേര്ക്കും ജീവന് നഷ്ടമായത്. ബംഗ്ലാദേശിലെ തുറമുഖ നഗരമായ ചിറ്റഗോങ്ങിലാണ് വലിയ പ്രതിഷേധവും വെടിവെപ്പുമുണ്ടായത്.
ചിറ്റഗോങ്ങില് വെള്ളിയാഴ്ച പ്രാര്ഥനക്ക് ശേഷം ജനങ്ങള് പ്രധാനമന്ത്രി മോദിക്കെതിരെ മുദ്രവാക്യം വിളികളുമായി അണിനിരന്നു. പ്രതിഷേധക്കാരെ തടയാന് പൊലീസ് ബാരിക്കേഡുകള് സ്ഥാപിച്ചിരുന്നു. ഇത് മറികടക്കാന് പ്രതിഷേധക്കാര് ശ്രമിച്ചതോടെ പൊലീസ് ടിയര്ഗ്യാസ് പ്രയോഗിക്കുകയും റബ്ബര് ബുള്ളറ്റ് ഉപയോഗിച്ച് വെടിവെക്കുകയും ചെയ്തു. തുടര്ന്ന് ലാത്തിച്ചാര്ജുമുണ്ടായി.