കൊച്ചി: ചികിത്സയിലായിരുന്ന തൃശൂരിലെ ബിജെപി സ്ഥാനാര്ത്ഥി സുരേഷ് ഗോപി ആശുപത്രി വിട്ടു. പനിയും ശ്വാസതടസവും അടക്കമുള്ള ആരോഗ്യ പ്രശ്നങ്ങളെ തുടര്ന്നാണ് അദ്ദേഹത്തെ കൊച്ചിയിലെ സ്വകാര്യ ആശുപത്രിയില് പ്രവേശിപ്പിച്ചിരുന്നത്. ന്യുമോണിയയെന്ന സംശയമുണ്ടായിരുന്നുവെങ്കിലും വിദഗ്ധ പരിശോധനയില് രോഗമില്ലെന്ന് സ്ഥിരീകരിച്ചു.
പത്ത് ദിവസത്തെ വിശ്രമമാണ് അദ്ദേഹത്തിന് ഡോക്ടര്മാര് നിര്ദേശിച്ചത്. അതിന് ശേഷം കൊവിഡ് വാക്സീന് എടുത്ത ശേഷം ആയിരിക്കും തൃശൂരിലടക്കം പ്രചരണ രംഗത്ത് സജീവമാകുക. തൃശ്ശൂരില് വിജയ സാധ്യത അല്ല മത്സര സാധ്യത ആണുള്ളതെന്ന് സുരേഷ് ഗോപി മാധ്യമങ്ങളോട് പ്രതികരിച്ചു.
പാര്ട്ടി നിര്ദേശ പ്രകാരമാണ് മത്സരിക്കുന്നത്. പാര്ട്ടി മുന്നോട്ട് വെച്ച നാലു മണ്ഡലങ്ങളില് നിന്നും തൃശൂര് താന് തെരഞ്ഞെടക്കുകയായിരുന്നുവെന്നും അദ്ദേഹം വ്യക്തമാക്കി.
മത്സരിക്കാന് താത്പര്യമില്ലെന്നറിയിച്ചിട്ടും ബിജെപി കേന്ദ്ര നേതൃത്വത്തിന്റെ നിര്ദ്ദേശപ്രകാരമാണ് സുരേഷ് ഗോപി തൃശൂരില് എന്ഡിഎ സ്ഥാനാര്ത്ഥിയായത്. തൃശൂര് അടക്കം എ പ്ലസ് മണ്ഡലത്തില് മത്സരത്തിന് ഉണ്ടാകണമെന്ന ശക്തമായ ആവശ്യം നേതൃത്വത്തിന്റെ ഭാഗത്ത് നിന്ന് നേരത്തെ തന്നെ ഉണ്ടായിരുന്നു. മത്സരിക്കാന് താല്പര്യമില്ലെന്നും നിര്ബന്ധമെങ്കില് ഗുരുവായൂരില് മത്സരിക്കാമെന്നും ആയിരുന്നു സുരേഷ് ഗോപിയുടെ ആദ്യ നിലപാട്. ഒടുവില് തൃശൂരില് തന്നെ സ്ഥാനാര്ത്ഥിയാകുകയായിരുന്നു