തിരുവനന്തപുരം: സംസ്ഥാനത്ത് ഇന്നും മഴ തുടരും. വടക്കൻ കേരളത്തിലാകും മഴ ശക്തമാകുക. തൃശ്ശൂർ മുതൽ കാസർകോട് വരെയുളള 7 ജില്ലകളിൽ ഇന്ന് യെല്ലോ അലർട്ട് പ്രഖ്യാപിച്ചിട്ടുണ്ട്. ഉച്ചയ്ക്ക് ശേഷം ഇടിമിന്നലോട് കൂടിയ ശക്തമായ മഴയ്ക്ക് സാധ്യതയുണ്ടെന്നാണ് മുന്നറിയിപ്പ്.
ബംഗാൾ ഉൾക്കടലിൽ ഒക്ടോബർ 9ന് രൂപംകൊണ്ട ശക്തമായ ന്യൂനമർദ്ദം 1000 കിലോമീറ്റർ കരയ്ക്കു നടുവിലൂടെ സഞ്ചരിച്ച് അറബിക്കടലിലെത്തി വീണ്ടും തീവ്രമായേക്കും. ആൻഡമാൻ തീരത്ത് ആരംഭിച്ച ന്യൂനമർദ്ദം ആന്ധ്ര, മഹാരാഷ്ട്രയുടെ തെക്കുഭാഗത്തിലൂടെ സഞ്ചരിച്ച് അറബിക്കടലിലാണ് ചേരുക.
വടക്കുപടിഞ്ഞാറൻ ദിശയിൽ സഞ്ചരിക്കുന്ന മർദ്ദം വ്യാഴാഴ്ച വൈകിട്ടോടെ അറബിക്കടലിൽ പ്രവേശിക്കുമെന്നാണ് നിഗമനം. തുടർന്ന് അത് വീണ്ടും തീവ്രമാകാനുള്ള സാധ്യത നിലനിൽക്കുന്നുണ്ട്. അതിനിടെ ബംഗാൾ ഉൾക്കടലിൽ പുതിയൊരു ന്യൂനമർദ്ദത്തിന്റെ സൂചനകൾ ഉള്ളതായും നിരീക്ഷിക്കുന്നുണ്ട്.
സംസ്ഥാനത്തെ മലയോരങ്ങളിലും വടക്കൻ ജില്ലകളിലും വ്യാഴാഴ്ചയും വെള്ളിയാഴ്ചയും കനത്ത മഴയുണ്ടാകും. തമിഴ്നാട്ടിലും അതിന്റെ ഭാഗമായി പാലക്കാടും മഴ ശക്തമാകും.
സംസ്ഥാനത്ത് വെള്ളിയാഴ്ച വരെയാണ് മഴ പ്രതീക്ഷിക്കുന്നത്. മണിക്കൂറിൽ 55 കിലോമീറ്റർ വേഗത്തിൽ കാറ്റുവിശാനിടയുളളതിനാൽ കേരള തീരത്ത് മത്സ്യബന്ധനത്തിന് പോകരുതെന്നാണ് നിർദ്ദേശം.
