കോട്ടയം: മന്ത്രി കെ.ടി. ജലീലിന്റെ രാജി ആവശ്യപ്പെട്ട് സംസ്ഥാനത്തിന്റെ വിവിധ ഭാഗങ്ങളിൽ രാഷ്ട്രിയ പാര്ട്ടികളുടെയും വിവിധ യുവജന സംഘടനകളുടെയും നേതൃത്വത്തിൽ നടത്തിയ പ്രതിഷേധ മാര്ച്ച് അക്രമാസക്തമായി. മലപ്പുറത്ത് യൂത്ത് ലീഗിന്റെയും യൂത്ത് കോണ്ഗ്രസിന്റെയും നേതൃത്വത്തില് നടത്തിയ പ്രതിഷേധം സംഘർഷത്തിൽ കലാശിച്ചു.
പോലീസ് ബാരിക്കേഡ് തകര്ക്കാന് ശ്രമിച്ച യൂത്ത് കോണ്ഗ്രസ് പ്രവര്ത്തകര്ക്ക് നേരെ പോലീസ് ജലപീരങ്കി പ്രയോഗിച്ചു. ലാത്തി ചാര്ജില് നിരവധി യൂത്ത് കോണ്ഗ്രസ് പ്രവര്ത്തകര്ക്ക് പരിക്കേറ്റു. ഒരു പ്രവര്ത്തകന്റെ കണ്ണിന് ഗുരുതര പരിക്കുണ്ട്.
കോട്ടയത്ത് കേരള കോണ്ഗ്രസ് ജോസഫ് വിഭാഗത്തിന്റെ നേതൃത്വത്തില് നടത്തിയ പ്രതിഷേധ മാര്ച്ചിലും സംഘര്ഷമുണ്ടായി. പ്രവര്ത്തകരെ പിരിച്ചു വിടാന് പോലീസ് ജലപീരങ്കി പ്രയോഗിച്ചു. അതിന് ശേഷം യൂത്ത് കോൺഗ്രസ് പ്രവർത്തകരും പ്രതിഷേധവുമായി എത്തി. പ്രതിഷേധക്കാർക്ക് നേരെ പൊലീസ് ജലപീരങ്കി പ്രയോഗിക്കുകയും ലാത്തിച്ചാർജ് നടത്തുകയും ചെയ്തു.
ആലപ്പുഴയില് യുവമോര്ച്ച പ്രവര്ത്തകരുടെ നേതൃത്വത്തിലാണ് പ്രതിഷേധം നടന്നത്. ബാരിക്കേഡിനു മുകളില് കയറി പ്രവര്ത്തകര് പ്രതിഷേധിച്ചു. ഇവരെ പിരിച്ചുവിടാന് പോലീസ് ജലപീരങ്കി പ്രയോഗിച്ചു. ലാത്തി ചാര്ജില് പ്രവര്ത്തകര്ക്ക് പരിക്കേറ്റു.