തിരുവനന്തപുരം: മുസ്‌ലിം ലീഗിനെതിരേ രൂക്ഷ വിമർശനവുമായി സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. കോൺഗ്രസിന്‍റെ ഒക്കത്തിരിക്കുന്ന കുഞ്ഞായി ലീഗ് അധപ്പതിക്കുകയാണെന്ന് കോടിയേരി ദേശാഭിമാനിയിൽ എഴുതിയ ലേഖനത്തിൽ വിമർശിക്കുന്നു.
രാമക്ഷേത്ര നിർമാണവുമായി ബന്ധപ്പെട്ട് കോൺഗ്രസ് നേതാവ് പ്രിയങ്ക ഗാന്ധിയുടെ പ്രസ്താവനയിൽ ലീഗ് നേതൃത്വം കൈക്കൊണ്ടത് അഴകൊഴമ്പൻ നയമാണ്. യുഡിഎഫിലെ മുഖ്യപങ്കാളിയായി ഇനിയും തുടർന്നാൽ സ്വന്തം അണികളിൽനിന്നുപോലും ലീഗ് നേതൃത്വം ഒറ്റപ്പെടും എന്നും കോടിയേരിയുടെ മുന്നറിയിപ്പ്.
പകൽപോലെ വ്യക്തമാകുന്ന കോൺഗ്രസിന്‍റെ രാഷ്ട്രീയ വഞ്ചനയോട് മുസ്‌ലിം ലീഗ് ഉൾപ്പെടെയുള്ള യുഡിഎഫിലെ കക്ഷികൾ എങ്ങനെ പ്രതികരിക്കുമെന്ന് ജനാധിപത്യ വിശ്വാസികൾ ഗൗരവത്തോടെ വീക്ഷിക്കുകയാണെന്നും കോടിയേരി ലേഖനത്തിൽ വ്യക്തമാക്കി.
