ന്യൂഡല്ഹി: ഡല്ഹി കലാപത്തില് മരണം 27 ആയി. കലാപവുമായി ബന്ധപ്പെട്ട 18 കേസുകള് രജിസ്റ്റര് ചെയ്തതായും 106 പേര് അറസ്റ്റിലായതായും ഡല്ഹി പോലീസ് അറിയിച്ചു.സംഘര്ഷ ബാധിത മേഖലകളില് പോലീസ് വിന്യാസം വര്ധിപ്പിച്ചു.
അതേസമയം, പരിക്കേറ്റവരില് നിരവധി പേരുടെ നില ഗുരുതരമായതിനാല് മരണസംഖ്യ ഉയരാനാണ് സാധ്യതയുണ്ടെന്നും റിപ്പോര്ട്ടുകളുണ്ട്. കൊല്ലപ്പെട്ടവരില് ഒന്പത് പേര് വെടിയേറ്റാണ് മരിച്ചതെന്നാണ് വിവരം.
സംഘര്ഷം നിലനില്ക്കുന്ന സാഹചര്യത്തില് വടക്കുകിഴക്കന് ദില്ലിയില് അടുത്ത മുപ്പത് ദിവസത്തേക്ക് നിരോധനാജ്ഞ പ്രഖ്യാപിച്ചിട്ടുണ്ട്. നിരോധനാജ്ഞ പ്രഖ്യാപിക്കുകയും കൂടുതല് സ്ഥലങ്ങളില് കേന്ദ്രസേനയെ ഇറക്കിയിട്ടും കലാപം പടരുന്ന പശ്ചാത്തലത്തില് അര്ധരാത്രിയോടെ ദേശീയ സുരക്ഷാ ഉപദേഷ്ടാവ് അജിത്ത് ഡോവല് നേരിട്ട് സംഘര്ഷ മേഖലയിലിറങ്ങി. സീമാപൂരില് എത്തിയ അജിത്ത് ഡോവല് സ്ഥിതിഗതികള് വിലയിരുത്തുകയും ഉദ്യോഗസ്ഥരുമായി കൂടിക്കാഴ്ച നടത്തുകയും ചെയ്തു.