പാലാ: ഉപതെരഞ്ഞെടുപ്പ് നടന്ന പാലാ നിയമസഭാ മണ്ഡലത്തിലെ ജനവിധി ഇന്നറിയാം. രാവിലെ എട്ടു മുതലാണ് വോട്ടെണ്ണല്. എട്ടരയോടെ ആദ്യ സൂചന വന്നു തുടങ്ങും. മുന് ധനമന്ത്രി കെ എം മാണിയുടെ നിര്യാണത്തെ തുടര്ന്ന് ഉപതിരഞ്ഞെടുപ്പ് വേണ്ടി വന്ന പാലായില് യുഡിഎഫ് – എല്ഡിഎഫ് മുന്നണിയും തികഞ്ഞ വിജയ പ്രതീക്ഷയിലാണ്. വോട്ടുനില മെച്ചപ്പെടുത്താമെന്ന വിശ്വാസത്തിലാണ് ബിജെപി.
പാലാ കാര്മല് പബ്ലിക് സ്കൂളില് വോട്ടെണ്ണലിനായി 14 മേശകള് സജ്ജീകരിച്ചു. ഒന്നുമുതല് എട്ടുവരെ മേശകളില് 13 റൗണ്ടും ഒന്പതു മുതല് 14 വരെ 12 റൗണ്ടും എണ്ണും. 176 ബൂത്തുകളിലായി 1,27,939 വോട്ട് പോള്ചെയ്തു. 28 പോസ്റ്റല് വോട്ടുകളും 152 ഇടിപിബി സര്വീസ് വോട്ടും ഉണ്ട്. ആകെ എണ്ണുന്ന വോട്ട് 1,28,119. പോസ്റ്റല് വോട്ടുകളും ഇടിപിബി സര്വീസ് വോട്ടുകളുമാണ് ആദ്യം എണ്ണുക. തുടര്ന്ന് അഞ്ചു ബൂത്തുകളിലെ വിവിപാറ്റ് യന്ത്രങ്ങളിലെ സ്ലിപ്പുകള് എണ്ണും.