പാലക്കാട്: പട്ടാമ്പി മത്സ്യമാർക്കറ്റിൽ കോവിഡ് വ്യാപനം അതിരൂക്ഷം. ഇന്ന് പട്ടാമ്പി മത്സ്യമാർക്കറ്റിൽ മാത്രം 67 പേർക്ക് രോഗം സ്ഥിരീകരിച്ചു. 525 പേർക്ക് ആന്‍റിജൻ പരിശോധന നടത്തിയതിലാണ് 67 പേർക്ക് രോഗം കണ്ടെത്തിയത്. മത്സ്യമാർക്കറ്റിലെ തൊഴിലാളിയായ ഒരാൾക്ക് ഉറവിടം അറിയാതെ രോഗബാധ സ്ഥിരീകരിച്ചതിന്‍റെ അടിസ്ഥാനത്തിലായിരുന്നു പരിശോധന.
ഇവിടെ മെഗാ ക്യാമ്പായി പരിശോധന തുടരുകയാണ്. വരുംദിവസങ്ങളിലും മാർക്കറ്റ് കേന്ദ്രീകരിച്ചും പട്ടാമ്പി ബ്ലോക്കിലെ പഞ്ചായത്തുകളിലും പരിശോധന ന ടത്തും. കൂടാതെ വലിയങ്ങാടിയിൽ ബുധനാഴ്ച രാത്രി 10 മുതൽ പുലർച്ചെ അഞ്ച് വരെ പരിശോധന നടത്തും. പുതുനഗരം മത്സ്യമാർക്കറ്റിലും പരിശോധന നടത്താൻ തീരുമാനിച്ചിട്ടുണ്ടെന്ന് ഡിഎംഒ അറിയിച്ചു. പട്ടാമ്പി മേഖലയിൽ നിയന്ത്രണം കടുപ്പിച്ചിട്ടുണ്ട്.
പട്ടാമ്പിയിലേത് ഉൾപ്പെടെ ജില്ലയിൽ ഇന്ന് 81 പേർക്കാണ് കോവിഡ് സ്ഥിരീകരിച്ചത്. രോഗം സ്ഥിരീകരിച്ചവരിൽ 11 പേർ വിവിധ രാജ്യങ്ങളിൽ നിന്നും ഇതര സംസ്ഥാനങ്ങളിൽ നിന്നും എത്തിയവരാണ്. രണ്ട് പേരുടെ രോഗബാധ ഉറവിടം വ്യക്തമല്ല. ഒരാൾക്ക് സമ്പർക്കത്തിലൂടെ രോഗം ബാധിച്ചു. 11 പേർ രോഗമുക്തരായി. നിലവിൽ ജില്ലയിൽ 338 പേരാണ് ചികിത്സയിലുള്ളത്
