തിരുവനന്തപുരം: കോട്ടയം, ഇടുക്കി ജില്ലകളെ ഗ്രീന്‍ സോണില്‍ നിന്ന് ഒഴിവാക്കി. വ്യാഴാഴ്ച ഈ രണ്ടു ജില്ലകളിലും രോഗം റിപ്പോര്‍ട്ട് ചെയ്തതോടെയാണ് ഇരു ജില്ലകളെയും ഓറഞ്ച് സോണിലേക്കു മാറ്റിയത്. കോട്ടയത്ത് രണ്ടുപേര്‍ക്കും ഇടുക്കിയില്‍ നാലു പേര്‍ക്കുമാണ് രോഗം സ്ഥിരീകരിച്ചത്.
കാസര്‍ഗോഡ്, കണ്ണൂര്‍, കോഴിക്കോട്, മലപ്പുറം ഈ നാലുജില്ലകള്‍ റെഡ് സോണില്‍ തുടരും. നാലു ജില്ലകളിലും കര്‍ശന നിയന്ത്രണങ്ങള്‍ തുടരും. ഓറഞ്ച് സോണിലുള്ള 10 ജില്ലകളിലും ഹോട്ട്സ്പോട്ടുകളായ പഞ്ചായത്തുകള്‍ അടച്ചുപൂട്ടും. മുനിസിപ്പാലിറ്റിയാണെങ്കില്‍ വാര്‍ഡുകളെയാണ് ഹോട്ട്സ്പോട്ടുകളായി പ്രഖ്യാപിക്കുക. കോര്‍പറേഷനാകുമ്പോള്‍ ഡിവിഷനുകള്‍ അതിര്‍ത്തികളാകും. ഹോട്ട്സ്പോട്ടുകളുണ്ടായാല്‍ ഇവ അടച്ചിടും. ഇതില്‍ ഏതൊക്കെ ഹോട്ട്സ്പോട്ട് പരിധിയില്‍ വരുമെന്നു ജില്ലാ ഭരണകൂടം തീരുമാനിക്കുമെന്നും മുഖ്യമന്ത്രി പിണറായി വിജയന്‍ അറിയിച്ചു.
