ക്രൈസ്റ്റ്ചർച്ച്: ന്യൂസിലൻഡിൽ രണ്ട് പള്ളികളിൽ നടന്ന വെടിവെപ്പിൽ 49 പേർ കൊല്ലപ്പെട്ടു. 20ൽ അധികം പേർക്ക് പരിക്കേറ്റു. ന്യൂസിലാൻഡ് പ്രധാനമന്ത്രി ജസീന്തയാണ് ഇക്കാര്യം ഔദ്യോഗികമായി അറിയിച്ചത്. വെള്ളിയാഴ്ച നിസ്ക്കാരത്തിനെത്തിയവരാണ് കൊല്ലപ്പെട്ടത്. ക്രൈസ്റ്റ്ചർച്ചിലെ ഹെഗ്ലി പാർക്കിന് സമീപത്തെ മോസ്ക്കിലും സൌത്ത് ഐലൻഡ് സിറ്റിയിലെ പള്ളിയിലുമാണ് വെടിവെപ്പ് നടന്നത്. വെടിവെപ്പിനുശേഷം കാറിൽ കടന്നുകളയാൻ ശ്രമിച്ച അക്രമിയെ പോലീസ് കീഴ്പ്പെടുത്തി. ബ്രെഹാം സ്ട്രീറ്റിൽനിന്നാണ് ഇയാളെ പിടികൂടിയത്.ഇവരുടെ കാറിൽനിന്നും വൻ സ്ഫോടക ശേഖരം കണ്ടെത്തി.
മെഷീൻ ഗൺ ഉപയോഗിച്ച് പ്രാദേശിക സമയം 1.40നാണ് അക്രമികൾ വെടിവെപ്പുനടത്തിയത്. കറുത്ത വസ്ത്രവും ഹെൽമെറ്റുംധരിച്ചാണ് അക്രമി സംഘം എത്തിയത്. സംഭവ സമയത്ത് 16 മുതൽ 50 വരെ പ്രായമുള്ളവർ പള്ളിയിൽ ഉണ്ടായിരുന്നു. യാതൊരു പ്രകോപനവുമില്ലാതെയായിരുന്നു ആക്രമം. സമാന സമയത്ത് ന്യൂസ്ലാന്റിലെ മറ്റൊരു പള്ളിയിലും ആക്രമണം നടന്നതായി റിപ്പോർട്ടുണ്ട്. സൌത്ത് ഐലൻഡ് സിറ്റിയിലെ ലിൻവുഡ് അവന്യൂവിലെ പള്ളിയിലാണ് വെടിവെപ്പ് നടന്നത്.
ഇതേസമയം ബംഗ്ലാദേശ് ക്രിക്കറ്റ് ടീം അംഗങ്ങൾ ക്രൈസ്റ്റ് ചർച്ചിലെ മുസ്ലിം പള്ളിക്ക് സമീപം ഉണ്ടായിരുന്നു. ശനിയാഴ്ച നടക്കുന്ന മൂന്നാം ടെസ്റ്റ് മത്സരത്തിനെത്തിയതാണ് ബംഗ്ലാദേശ് ടീം. സംഭവം ഉണ്ടായ ഉടനെ ടീം സ്ഥലത്തുനിന്നും രക്ഷപെട്ടു. താരങ്ങൾ സുരക്ഷിതരാണ്.
വെടിവെപ്പുമായി ബന്ധപ്പെട്ട് ഒരാളെ കസ്റ്റഡിയിലെടുത്തതായി ന്യൂസ്ലാന്റ് പോലീസ് ട്വീറ്റ് ചെയ്തു. സ്ഥലത്ത് കൂടുതൽ പരിശോധന നടത്തിവരികയാണ്. സ്ഥലത്തെ മുസ്ലിം പള്ളികളും സ്കൂളുകളും അടിയന്തിരമായി അടയ്ക്കണമെന്ന് സർക്കാർ നിർദ്ദേശം നൽകിയിട്ടുണ്ട്.
