അരുണ് ഗോപിയുടെ സംവിധാനത്തില് പ്രണവ് മോഹന്ലാല് നായകനാകുന്ന ‘ഇരുപത്തിയൊന്നാം നൂറ്റാണ്ട്’ എന്ന ചിത്രത്തിന്റെ ഫസ്റ്റ് ലുക്ക് പോസ്റ്റര് മോഹന്ലാല് തന്റെ ഫേസ്ബുക്ക് പേജിലൂടെ പുറത്തുവിട്ടു. മോഹന്ലാലിന്റെ കരിയറിന്റെ ഏറ്റവും മികച്ച ചിത്രങ്ങളിലൊന്നാണ് 1987 ല് പുറത്തിറങ്ങിയ ‘ഇരുപതാം നൂറ്റാണ്ട്’. ‘സാഗര് ഏലിയാസ് ജാക്കി’ എന്ന കഥാപാത്രം മോഹന്ലാലിനെ സൂപ്പര്താര പദവിയിലേക്ക് ഉയര്ത്തുന്നതില് വലിയ പങ്കാണ് വഹിച്ചത്. 31 വര്ഷങ്ങള്ക്കുശേഷം ഇരുപത്തിയൊന്നാം നൂറ്റാണ്ടുമായി പ്രണവ് എത്തുമ്പോള് പേരില് മാത്രമേ സിനിമയ്ക്ക് മോഹന്ലാലിന്റെ സിനിമയുമായി സാമ്യമുളളൂ എന്നാണ് അണിയറ വര്ത്തമാനങ്ങള്. ചിത്രം ഒരു ഡോണിന്റെ കഥയല്ലെന്നും അണിയറ പ്രവര്ത്തകര് എടുത്തു പറയുന്നു.
ടോമിച്ചന് മുളകുപാടമാണ് ‘ഇരുപത്തിയൊന്നാം നൂറ്റാണ്ടി’ന്റെ നിര്മ്മാതാവ്. പുലിമുരുകന്റെ ആക്ഷന് ഡയറക്ടറായ പീറ്റര് ഹെയ്നാണ് ആക്ഷന് ഡയറക്ടര്. ഛായാഗ്രഹണം അഭിനന്ദന് രാമാനുജന്. ഗോപി സുന്ദറിന്റേതാണ് സംഗീതം. പുതുമുഖമായ റേച്ചല് ആണ് ചിത്രത്തില് പ്രണവിന്റെ നായിക. കലാഭവന് ഷാജോണ്, മനോജ് കെ. ജയന്, സുരേഷ് കുമാര്, ധര്മജന് ബോള്ഗാട്ടി എന്നിവരും ചിത്രത്തില് അണിനിരക്കുന്നു.
ജിത്തു ജോസഫ് സംവിധാനം ചെയ്ത ‘ആദി’ എന്ന ചിത്രത്തിലൂടെയാണ് പ്രണവ് നായകനായി അരങ്ങേറ്റം കുറിച്ചത്. പ്രണവിന്റെ രണ്ടാമത്തെ ചിത്രം എന്നതു പോലെ അരുണ് ഗോപിയുടേയും രണ്ടാമത്തെ ചിത്രമാണ് ‘ഇരുപത്തിയൊന്നാം നൂറ്റാണ്ട്’. ‘രാമലീല’യായിരുന്നു അരുണ് ഗോപിയുടെ ആദ്യ ചിത്രം.